Kërcënime të tjera ndaj gazetarëve nga kreu i RTSH, 01.08.2024, Tiranë

Translations: English 

Më 31 korrik dhe 1 gusht, të paktën pesë ish-punonjës të Radio Televizionit Shqiptar (RTSH) u thirrën në Komisariatin e Policisë së Tiranës. Punonjësit u morën në pyetje dhe ju kontrolluan celularët. Ky veprim mësohet se është ndërmarrë pas denoncimit të Drejtorit të Përgjithshëm të RTSH, Alfred Peza, me pretendimin për “dëmtim imazhi”. Ish-punonjësit pretendojnë se janë marrë në pyetje për deklaratat që kanë bërë në lidhje me shkarkimet masive dhe të dyshuara të padrejta nga Alfred Peza. Celularët e tyre u kontrolluan në kuadër të hetimit, të cilin punonjësit e shohin si cenim të privatësisë së tyre dhe tentativë për t’i frikësuar. Ish-punonjësit janë shprehur hapur për ato që i cilësojnë si shkarkime të padrejta në RTSH, duke lënë të kuptohet se veprimet e policisë janë hakmarrëse.

Rrjeti Safe Journalist ka raportuar vazhdimisht për problematikat në RTSH (këtu dhe këtu).

_______________________

Përditësime mbi sulmin:

Në përgjigje të një kërkese për informacion, Policia e Shtetit lidhur me këtë çështje deklaron: Sektori i Hetimit të Krimeve Kompjuterike i Drejtorisë së Policisë Tiranë, pas një denoncimi kriminal të paraqitur më 18 korrik 2024, e ka referuar çështjen në Prokurorinë e Gjykatës së Shkallës së Parë Tiranë. Prokuroria ka regjistruar një procedim penal me numër çështjeje 4752 për krimin e “mashtrimit me kompjuter”, sipas nenit 186/a të Kodit Penal. Çështja është nën hetim, me disa veprime hetimore të deleguara nga prokurori që ende nuk janë finalizuar. Pesë individë kanë dhënë dëshmi dhe telefonat e tyre mobilë janë ekzaminuar pjesërisht për materialet përkatëse. Përgjigjja thekson se veprimet hetimore nuk kanë komprometuar burimet e informacionit të gazetarëve të përfshirë.
Lexoni deklaratën e plotë në shqip këtu.