Навреди и закани беа упатени кон екипата на телевизијата N1 за време на собирот што се одржа во саботата во Сремска Митровица, Србија, организиран од владејачката Српска напредна партија по повод Денот на државноста. Исто така, во изминатите денови, новинарот Динко Грухонјиќ доби повеќе закани преку социјалните мрежи од различни профили.
Новинарката на телевизијата N1, Ксенија Павков, изјави дека пред собирот имала дилема дали да ја отстрани заштитната сунѓерска облога од микрофонот на која е испишано името на медиумот.
Таа додаде дека таа и снимателот стоеле на плоштадот, чекајќи да се вклучат во живо, кога луѓето ги забележале и почнале да ги навредуваат и пцујат.
„Еден човек беше особено агресивен. Рече дека не може да дочека да нè убијат сите што работиме на N1, и уште ни кажа дека треба да дојдеме во Република Српска (БиХ) за да видиме што ќе ни се случи. Многу непријатно“, изјави Ксенија Павков.
На снимката објавена на веб-страницата на N1, јасно се слушаат заканите што ги упатуваат случајни минувачи.
Во актуелните случувања во Србија, речиси сите независни новинари се мета на напади.
Новинарот и професор на Филозофскиот факултет во Нови Сад, Динко Грухонјиќ, повторно доби повеќе закани и навреди од различни профили преку социјалните мрежи, што укажува на можни координирани активности. Заканите, проследени со бројни пцовки, беа упатени и кон членовите на неговото семејство, особено кон неговите деца.
„… и ти запомни, каде и да те сретнеме, ќе си го изедеш јазикот“, „…скоро ќе одиш во затвор, ти ништожник… треба да ти ги искршат коските и да ти ги отсечат јајцата, ти фашисту, и да те избркаат од Србија, ти мртов кучињо…“, се само дел од пораките кои Грухонјиќ ги доби во изминатите денови.
Независното здружение на новинари на Србија најостро ги осудува овие закани и смета дека причината за ова е омразата што носителите на власта со години ја шират кон независните новинари и медиуми преку провладини медиуми, при што предводник е претседателот Александар Вучиќ.
Мрежата SafeJournalists исто така ги осудува споменатите закани и ги повикува надлежните институции во Србија да реагираат. SafeJournalists предупредува дека е прашање на време кога ќе дојде до физички напад врз новинарите во Србија, поради што најпрво го повикува претседателот на Србија, Александар Вучиќ, да престане со навреди и ширење невистини за независните новинари и медиуми. SafeJournalists го повикува и Министерството за информатичко општество и телекомуникации да стори сѐ што е во нивна надлежност за да ги прекинат кампањите на омаловажување што ги водат провладините медиуми против независните новинари.
Мрежата SafeJournalists ќе ги информира релевантните национални и меѓународни чинители за овие случувања.
Секој напад врз новинарите е напад врз јавниот интерес, демократијата и правата на сите граѓани.
Приштина – Скопје – Сараево – Загреб – Белград – Подгорица, 18 февруари 2025
Здружение на новинарите на Косово
Здружение на новинарите на Македонија
Здружение на новинарите на БиХ
Хрватско новинарско друштво
Независно здружение на новинари на Србија
Синдикат на медиумите на Црна Гора