Gjykata rrëzon pretendimet e Mirel Mërtirit kundër BIRN Albania

By
Tirana
-
0
110
Source/Author: https://www.reporter.al/2023/02/24/gjykata-rrezon-pretendimet-e-mirel-mertirit-kunder-birn-albania/
Source/Photo: https://www.reporter.al/2023/02/24/gjykata-rrezon-pretendimet-e-mirel-mertirit-kunder-birn-albania/

Biznesmeni i incineratorëve, aktualisht në kërkim nga SPAK, kërkoi 300 mijë lekë dëmshpërblim me pretendimin se një shkrim i BIRN ku u ekspozuan lidhjet e tij politike i pati cenuar dinjitetin. Gjyqtarja Anila Karanxha hodhi poshtë padinë të premten dhe i ngarkoi Mërtirit kostot gjyqësore.

Gjykata e Rrethit Gjyqësor Tiranë rrëzoi të premten kërkesën për dëmshpërblim të Mirel Mërtirit nga BIRN Albania si e pabazuar në prova e në ligj pas një procesi gjyqësor që zgjati më shumë se dy vjet. Mërtiri pati kërkuar një dëmshpërblim dhe përgënjeshtrim nga BIRN Albania duke pretenduar cënim imazhi nga shkrimi Politika pas plehrave: Kush është biznesmeni në hije i monopolit të inceneratorëve me autorë Alensandra Bogdani dhe Besar Likmeta, publikuar në reporter.al në 17 shtator 2020.

Shkrimi ekspozoi Mërtirin si personi që qëndron në hije të skandalit të incineratorëve, tre projekte shumë të kushtueshme të qeverisë shqiptare, dy prej të cilave janë sekuestruar nga Prokuroria e Posaçme si pjesë e hetimit për korrupsion, pastrim parash dhe abuzim me detyrën ndaj ish-ministrit të Mjedisit Lefter Koka, ish-deputetit Alqi Bllako dhe shumë individëve të tjerë, përfshirë Mërtirin.

Në janar 2021, Mërtiri ngriti padi në Gjykatën e Tiranës me pretendimin se shkrimi i ka shkaktuar “një dëm shumë të rëndë moral dhe ekzistencial.”

BIRN i qëndroi shkrimit të publikuar dhe e konsideroi atë si një përpjekje për frikësim të gazetarëve.

Pas vendimit të së premtes, kryeredaktori i BIRN Albania Besar Likmeta dhe një nga dy autorët e shkrimit deklaroi: “Raportimi i BIRN mbi inceneratorët mbështetet në më shumë se 77 dokumente – me mijëra faqje të dhëna mbi biznesin e pisët të mbetjeve në Shqipëri, një duzinë intervista nga dëshmitarë kyç dhe ekspertë, si dhe fakte dhe të dhëna njohura botërisht.

Padia ishte jo vetëm e pabazuar në fakte, siç koha dhe veprimet e organit të akuzës kanë dëshmuar, duke e marrë z.Mërtiri të pandehur, por ishte një përpjekje për të censuruar median e pavarur dhe gazetarët që zbardhin të vërtetat për korrupsionin dhe keqpërdorimin e parave publike, pa u ndikuar nga presionet e individëve të veshur me pushtet apo të fryrë me para.”

RELATED ARTICLESMORE FROM AUTHOR