Qeveria e Kosovës sot ka njoftuar se do t’u ofrojë strehim pesë gazetarëve që ikin nga persekutimi në Afganistan. Gazetarëve do t’u sigurohet strehim, pagë mujore, sigurim shëndetësor dhe një biletë kthimi, kur rrethanat të krijohen që ata të kthehen në shtëpitë e tyre.
Projekti do të integrohet në programin e ECPMF-së për Gazetarët në Rezidencë në Kosovë, në bashkëpunim me Federatën Evropiane të Gazetarëve (EFJ).
Organizatat do të bashkëpunojnë Asociacionin e Gazetarëve të Kosovës – AGK, si partner implementues. Pas njoftimit, Zyrtarja Ligjore e ECPMF-së, Flutura Kusari, tha se: “Ne e mirëpresim këtë vendim të Qeverisë së Kosovës, të cilët sërish po ofrojnë mbështetjen e tyre për gazetarët të cilët janë të persekutuar thjesht për kryerjen e punës së tyre. Nga programet tona ekzistuese JiR në Leipzig dhe Kosovë, ne e dimë se ndihma e punonjësve të medias me zhvendosjen në një kohë krize të thellë është e pakrahasueshme. Ne i jemi mirënjohës edhe qeverisë gjermane për mbështetjen thelbësore dhe mundësinë që të jemi në gjendje të ofrojmë këtë mbështetje edhe për gazetarët afganë.”
“Ne u jemi shumë mirënjohës autoriteteve të Kosovës, të cilët po tregojnë një ndjenjë të jashtëzakonshme solidariteti me gazetarët e rrezikuar në mbarë botën”, tha Sekretari i Përgjithshëm i EFJ-së, Ricardo Gutiérrez.
“Dëshiroj të përgëzoj edhe organizatat e gazetarëve evropianë, dhe në veçanti partnerët tanë nga AGK-ja, të cilët me përkushtim shembullor po mbështesin kolegët tanë ukrainas dhe afganë në mërgim. Solidariteti është një përgjigje efektive ndaj atyre që duan të shkatërrojnë gazetarinë.”
Kryetari i Bordit të AGK-së, Xhemajl Rexha, tha: “Jemi të kënaqur që kolegët tanë afganë do të mund ta quajnë Kosovën shtëpinë e tyre së shpejti. Kjo do të shpërfaqë atë se bashkëpunimi jonë tashmë me EFJ-në, ECMPF dhe Qeverinë e Kosovës, të zgjerohet përmes programit “Gazetarët në Rezidencë – Kosovë” me gazetarë, puna e të cilëve është bërë e pamundur për shkak të gjendjes së luftës nëpër vendet e tyre. Ne në AGK, jemi të gatshëm të bëjmë maksimumin për të ndihmuar kolegët afganë të punojnë si gazetarë nga Kosova, në një mjedis të sigurt.”
Programi JiR në Kosovë për gazetarët ukrainas dhe afganë mbështetet bujarisht nga Iniciativa Hannah Arendt, një program i nisur bashkërisht nga Ministrja e Jashtme, Annalena Baerbock dhe Ministrja e Shtetit për Kulturën, Claudia Roth.
Programi JiR Kosovo është pjesë e Zërave të Ukrainës, një projekt i zbatuar nga ECPMF dhe i financuar nga Iniciativa Hannah Arendt.
Informatat se si mund të aplikoni do të publikohen së shpejti në ueb faqet tona, si dhe do të shpërndahet përmes rrjeteve sociale.