СКОПЈЕ, 02.03.2018 – Словачката полиција приведе седум лица во рамките на истрагата за убиството на истражувачкиот новинар Јан Кучијак, изјави шефот на полицијата Тибор Гашпар, пренесуваат локалните медиуми. Засега нема повеќе детали. Гашпар претходно изјави дека полицијата извршила претреси на поголемиот број адреси на истокот од Словачка поврзани со луѓето за кои новинарот се интересирал.
Новинарот и неговата вереница се убиени од огнено оружје во нивниот дом минатиот викенд. Гашпар не ги објави имињата на приведените, но изјави дека рациите се поврзани со италијанскиот бизнисмен, кој наводно е поврзан со италијанската мафија, за што Кучијак пишувал во својот последен, постхумно објавен текст.