До Синдикатот на новинари и медиумски работници вечерва пристигна поплака од новинари и медиумски работници (фото-репортери и сниматели) за начинот на организираниот превоз од страна на Владата за медиумските екипи за пречек на пристигнувањето на граѓани од Авганистан кои вечерва пристигнуваат во Скопје.
Акредитираните медиуми кои прашале за протоколите добиле одговор дека ќе се почитуваат сите мерки и протоколи при организираниот превоз. Сепак кога пристигнале пред Владата забележале дека во трите минибуси нема простор за дистанца, ниту возилото е климатизирано ниту, пак, се отворил прозорец за време на патувањето на релација Влада – Меѓународен Аеродром Скопје.
ССНМ во овој контекст потсетува дека според важечките протоколи донесени од владата превоз со возила со најмалку девет седишта, не сметајќи го и тоа на возачот, мора да биде организиран со максимална пополнетост од 75% (протокол бр.55).
ССНМ во услови на влошена епидемиолошка слика во земјата бара од владата да се придржува до донесените протоколи од нејзина страна, а кои важат за сите кои организираат превоз на патници.
ССНМ одново ги повикува надлежните и институциите да водат грижа за здравјето на новинарите и медиумските работници при организирање на настани за медиуми.