Kërcënime ndaj organeve dhe organizatave mediatike, 07.03.2025, Tiranë

Translations: English 

Më 7 mars 2025, në ora 14:00, u mbajt një takim i organizuar nga ekipi ligjor i kryetarit të bashkisë së Tiranës, Erion Veliaj, për të dhënë përditësime mbi rastin e tij. Gazetarët u ftuan me kushte të rrepta që ndalonin përdorimin e kamerave ose pajisjeve regjistruese gjatë ngjarjes. Ky kufizim ka shkaktuar kritika të mëdha nga profesionistët e medias dhe mbrojtësit e lirisë së medias, të cilët e shohin këtë si një përpjekje për të kontrolluar narrativën dhe shtypur raportimin e pavarur.

Erion Veliaj është në paraburgim që nga 10 shkurti 2025, duke u përballur me akuza për korrupsion, pastrim parash dhe keqpërdorim të detyrës. Takimi u paraqit si një mundësi për ekipin ligjor të Veliajt për t’i informuar gazetarët mbi situatën e tij ligjore. Megjithatë, kufizimet e vendosura kanë ngritur shqetësime në lidhje me transparencën dhe përgjegjshmërinë.

Kreu i Asociacionit të Gazetarëve të Shqiperisë Isa Myzyraj bëri thirrje publike për një bojkot të takimit, duke e dënuar atë si një “ngjarje propagandistike” e cila mundësonte vetëm publikimin e versionit të ngjarjes nga ekipi i Veliajt, duke kufizuar hetimin gazetaresk. Pavarësisht kësaj thirrjeje për solidaritet, gjashtë media dërguan gazetarët e tyre për të marrë pjesë në takim.

Ndalesa për përdorimin e kamerave dhe pajisjeve regjistruese minon mundësinë e gazetarëve për të dokumentuar ngjarjet në mënyrë të saktë dhe transparente, duke kufizuar autonominë e tyre editoriale. Duke vendosur këto kushte, ekipi ligjor i Veliajt efektivisht kufizon kontrollin dhe siguron që vetëm versioni i tyre i ngjarjes të arrijë në publik. Ky incident është pjesë e një modeli më të gjerë gjatë mandatit të Veliajt si kryetar bashkie, i shoqëruar me armiqësi ndaj gazetarëve, duke përfshirë shmangien e konferencave për shtyp dhe përdorimin e taktikave të frikësimit.

Më 6 mars 2025, Report TV transmetoi një intervistë me Kryetarin e Bashkisë së Tiranës, Erion Veliaj, duke krijuar iluzionin se ai po fliste nga zyra e tij. Ndërkohë që Veliaj është në paraburgim, transmetimi përfshiu një video të gjeneruar me përdorimin e inteligjencës artificiale (AI).

Ky vendim ka shkaktuar polemika, me kritika që argumentojnë se intervista e gjeneruar me AI promovon propagandë dhe synon të manipulojë opinionin publik. Përdorimi i inteligjencës artificiale për të portretizuar Veliajn në një ambient dukshëm normal, e minimizon realitetin e paraburgimit të tij, duke mundësuar ndikimin në perceptimin publik dhe duke ngritur dilema etike serioze në lidhje me përdorimin e AI në gazetari dhe mundësinë e shtrembërimit të diskursit publik.