Kuvendi i Shqipërisë zgjodhi 11 anëtarët e rinj të Këshillit Drejtues të RTSH në seancën e fundit parlamentare të kësaj legjislature. Fatjon Hoxhalli u zgjodh kryetar me 74 vota, duke mposhtur Helidon Halitin. Anëtarët më të votuar ishin Osman Mula (84 vota), Pano Xhixho (82 vota), Rajmonda Bulku (78 vota), Zamira Kita (77 vota) dhe Bujar Kapexhiu (72 vota).
Më parë, Kuvendi kishte vendosur të shkrijë Këshillin Drejtues ekzistues pas polemikave mbi procesin e përzgjedhjes së Drejtorit të Përgjithshëm të RTSH, ku tre nga pesë kandidatët u skualifikuan për mungesë kriteresh. Procesi u shoqërua me polemika, duke përfshirë edhe votimin online të një anëtari nga Vietnami. Pas dorëheqjes së dy anëtarëve dhe pretendimeve për shkelje të vazhdueshme, Parlamenti vendosi të shkarkojë të gjithë anëtarët e Këshillit Drejtues, përfshirë kryetarin Leka Bungo.
.