СКОПЈЕ, 08.11.2017 – Здружението на новинари на Македонија завчера испрати претставка до Одделот за внатрешна контрола при МВР за приведувањето на новинарите Махмути и Ука, кои минатата недела беа бесправно задржани околу 6 часа во полициската станица „Кисела вода“, поради наводно снимање на судскиот совет за време на изрекување на пресудата за случајот „Диво Насеље“.
Во претставката ЗНМ бара објаснување од полицијата за причините и основот за 6-часовното задржување на новинарите Махмути и Ука.
Освен тоа, ЗНМ бара полицијата да спроведе истрага за овој случај и доколку се утврди пречекорување на овластувањата на полициските службеници да се покренат соодветни дисциплински мерки.
Здружението очекува МВР брзо да ја разгледа претставката и ќе не известат за резултатите од истрага.
Регионалната платформа јавно го осуди ваквото однесување на полицијата, и очекува од македонските власти да го истражат случајот до крај.
