SafeJournalists: Të identifikohet e të ndëshkohet menjëherë personi që kërcënoi me vdekje gazetarët N1 në Serbi

    0
    73
    photo: canva

    Ekipi i N1 ka patur kërcënime me vdekje mbrëmjen e djeshme në uebfaqen e tyre.

    Në mesin e fyerjeve të shumta, e duke i quajtur tradhëtarë dhe duke i kërcënuar si “e dijmë se ku jetojnë secili gazetar/e si dhe cili/la e nget cilën makinë”, ata pranuan edhe kërcënime si “do të ju vrasim të gjithëve së shpejti”.

    Kërcënimi u raportua në Prokurorinë Speciale për krime kibernetike/teknologjike.

    Igor Boziq, drejtor programi i televizionit N1, thotë se në 10 vjet, nga kërcënimet e panumërta, vetëm disa raste janë zgjidhur. “Kanë kaluar disa vite që nga gjetja e autorit të fundit. Institucionet që kanë për detyrë të mbrojnë të gjithë qytetarët duhet të kenë një ndjeshmëri të veçantë ndaj gazetarëve që përfaqësojnë zërin e qytetarëve. Është një hap i vogël nga kërcënimet deri te sulmi fizik. Çfarë duhet të presin gazetarët kur marrin një mesazh se dikush do t’i vrasë dhe i njëjti autor pretendon se e di se ku jetojnë gazetarët dhe çfarë makinash ngasin? Në këtë vend askush nuk mori përgjegjësi për tre vrasje të gazetarëve dhe një për vendosjen e bombës në një apartament. Nuk e morëm vesh kurrë se kush e kërcënoi redaksinë e Danasit se do të përfundonin si gazetarët e Charlie Hebdo dhe një sërë shembujsh të tjerë drastikë. Pyetja ime është, a lejohen disa njerëz të bëjnë diçka, qoftë edhe për të frikësuar gazetarët që nuk janë në favor të regjimit?” ka thënë Boziq.

    Shoqata e Pavarur e Gazetarëve të Serbisë (IJAS), dënon ashpër kërcënime të tilla të rrezikshme. Shteti duhet të dërgojë urgjentisht një mesazh të fortë se kjo lloj sjelljeje është e papranueshme dhe të dënojë kërcënimet. Vetëm dënimet e vazhdueshme dhe mesazhi për qytetarët se kërcënime të tilla janë të papranueshme, së bashku me masat represive ndaj atyre që i kryejnë dhe zgjidhja e rasteve, mund të bëjnë që aktivitete të tilla të kenë efekt frenues për ata që kërcënojnë dhe gazetarët të ndihen më të sigurt.

    Rrjeti SafeJournalists, i cili përfaqëson profesionistët e mediave në Ballkanin Perëndimor, i bashkohet anëtarit të tij IJAS dhe u bën thirrje institucioneve kompetente që sa më shpejt të gjejnë personin që ka lënë një koment të tillë dhe të procedojnë më tej këtë rast. Rrjeti gjithashtu u bën thirrje zyrtarëve publikë dhe politikanëve që të përmbahen nga synimi i mediave të caktuara në Serbi, sepse retorika e tyre inkurajon individët që më vonë të kërcënojnë mediat në këtë mënyrë.

     

    Rrjeti SafeJournalists do të informojë palët e interesuara përkatëse kombëtare dhe ndërkombëtare për këtë rast.

    Çdo sulm ndaj gazetarëve është sulm ndaj interesit publik, demokracisë dhe të drejtave të të gjithë qytetarëve.

    Prishtinë – Shkup – Sarajevë – Zagreb – Beograd – Podgoricë, 27.02.2024

    Association of Journalists of Kosovo

    Association of Journalists of Macedonia

    BH Journalists Association

    Croatian Journalists’ Association

    Independent Journalists Association of Serbia

    Trade Union of Media of Montenegro