Foto: Canva
Rrjeti SafeJournalists dënon fuqishëm kërcënimet e reja me vdekje të dërguara ndaj Marko Vidojkovićit, autor i emisionit Dobar loš zao (DLZ) dhe kolumnist i gazetës Danas, përmes rrjetit social Facebook.
Vidojković ka marrë mesazhe në kutinë e tij private nga llogaria “Simic Dobri”, në të cilat, përveç fyerjeve, është kërcënuar drejtpërdrejt me dhunë dhe djegie.
Në mesin e mesazheve që ai ka marrë përmes Facebook-ut janë: “Ta q*** nënën ustashe” dhe “Copë m*** e qelbur, eja në Serbi, ta q*** nënën tradhtare. Ti do ta njohësh Kosovën? Ti do ta shesësh shtëpinë time, vendin tim? Edhe ty do të të djeg, p*** ustashe.”
Kërcënimet janë raportuar në Prokurorinë Speciale për Krimin e Teknologjisë së Lartë.
Vidojković i tha Rrjetit SafeJournalists se kërcënimet pasuan pasi ai përmendi mundësinë e ndryshimit të Kushtetutës gjatë emisionit Dobar loš zao.
“Pasi përmenda mundësinë e ndryshimit të Kushtetutës në DLZ, të mërkurën në mëngjes TV Informer nisi një fushatë diskredituese që zgjati rreth dy orë. Gjatë asaj fushate mediatike, moderatori dhe të ftuarit më përshkruan si tradhtar që dëshiron t’ia marrë Kosovën Serbisë. Si zakonisht në situata të tilla, në rrjetet sociale pasuan fyerjet më të rënda, ndërsa më pas mora edhe një kërcënim se do të më digjnin, i dërguar përmes një mesazhi privat në Facebook nga një person i panjohur. E raportova kërcënimin, prokuroria më kontaktoi shumë shpejt, por nuk pres që policia ta kërkojë autorin, sepse hera e fundit që e bëri këtë në rastin tim ishte në vitin 2021”, tha Vidojković.
Mesazhe të tilla përbëjnë kërcënim serioz për sigurinë e Marko Vidojkovićit dhe janë një tjetër tregues i mjedisit të rrezikshëm në të cilin punojnë gazetarët dhe punonjësit e medias në Serbi, veçanërisht ata që përballen vazhdimisht me fushata urrejtjeje, shënjestrim dhe kërcënime në rrjetet sociale.
Rikujtojmë se Marko Vidojković dhe kolegu i tij Nenad Kulačin janë ndër punonjësit e medias më të ekspozuar në Serbi ndaj kërcënimeve me vdekje dhe kërcënimeve me dhunë të dërguara përmes rrjeteve sociale. Pavarësisht raportimeve të shumta dhe reagimeve publike, mungesa e një përgjigjeje efikase nga institucionet vazhdon t’i inkurajojë autorët dhe të dërgojë mesazhin e mosndëshkueshmërisë.
Rrjeti SafeJournalists i bën thirrje Prokurorisë Speciale për Krimin e Teknologjisë së Lartë dhe policisë që të identifikojnë urgjentisht personin që qëndron pas llogarisë nga e cila janë dërguar kërcënimet, të zhvillojnë një hetim efektiv dhe të ndërmarrin të gjitha masat e parashikuara me ligj për ta vënë autorin para përgjegjësisë penale.
Çdo kërcënim i drejtpërdrejtë kërkon një reagim të shpejtë dhe vendimtar nga autoritetet kompetente, sepse mosndëshkueshmëria në raste të tilla e rrezikon edhe më tej sigurinë e gazetarëve dhe lirinë e medias në Serbi.
Rrjeti SafeJournalists do të vazhdojë ta monitorojë këtë rast dhe do të informojë akterët përkatës vendorë dhe ndërkombëtarë.
Çdo sulm ndaj gazetarëve është sulm ndaj lirisë së medias dhe vlerave demokratike.
Prishtinë – Shkup – Sarajevë – Zagreb – Beograd – Podgoricë – Tiranë, 2 korrik 2026
Shoqata Kroate e Gazetarëve
Asociacioni i Gazetarëve të Kosovës
Shoqata e Gazetarëve të Maqedonisë
Shoqata e Gazetarëve të Bosnjë dhe Hercegovinës
Shoqata e Pavarur e Gazetarëve të Serbisë
Sindikata e Mediave të Malit të Zi