Rrjeti SafeJournalists është informuar për shkeljen e të dhënave personale të Edmond Hoxhaj, gazetar në Rrjetin BIRN Albania dhe Reporter.al dhe bashkëshortes së tij. Mesnatën e 23 prillit 2022, Edmondi dhe gruaja e tij zbuluan aksidentalisht në llogaritë e tyre në portalin e-Albania (portali i shërbimeve elektronike) se një noter i quajtur Agron Bajri kishte gjeneruar certifikatën e familjes së tyre më 14 prill dhe pak minuta më vonë kishte gjeneruar një faturë për pagesën e kontributeve të gruas së tij. Edmondi dhe bashkëshortja e tij nuk e njohin personalisht këtë noter dhe nuk e kanë autorizuar të gjenerojë dokumente personale. Pra, zoti Bajri i ka kryer këto veprime pa pëlqimin dhe pa dijeninë e gazetarit të BIRN dhe bashkëshortes së tij. Edmondi deklaroi për Rrjetin SafeJournalists se “Nuk kemi pasur asnjë kontakt apo njohje të mëparshme me këtë person, as mua dhe as gruan time dhe as nuk i kemi kërkuar një gjë të tillë”.
Edmond Hoxhaj ka ndjekur seancat dëgjimore publike të procesit të vettingut të zonjës Elizabeta Imeraj, drejtuese e Prokurorisë së Tiranës nga data 30 mars deri më 12 prill dhe ka dëgjuar gjatë këtyre seancave se Agron Bajri ishte ish-bashkëshorti i zonjës Imeraj. Pasi ka kryer një verifikim me mjetet e kërkimit në internet, Edmondi ka konstatuar se ish-bashkëshorti i Imerajt ishte noter dhe quhej Agron Bajri.
I pyetur nga Rrjeti SafeJournalists në Shqipëri, Edmondi u shpreh se mendon se zoti Bajri ka gjeneruar të dhënat personale të tij dhe bashkëshortes së tij për shkak të punës që Edmondi po bën në raportimin e rastit gjatë procesit të vetingut të zonjës Imeraj. Ai tha gjithashtu se “Pavarësisht kësaj situate, unë po vazhdoj punën time duke ushtruar profesionin e gazetarit”.
Kërkuesja e SafeJournalists në Shqipëri Blerjana Bino tha se dënimi i këtij rasti duhet të jetë shumë i zëshëm nga gazetarët dhe se institucionet përkatëse duhet të marrin masat e nevojshme. “Siguria digjitale e gazetarëve dhe veçanërisht e gazetarëve investigativë është shumë e pasigurt në Shqipëri. Rasti i z. Edmond Hoxhaj duhet parë si një thirrje zgjimi për të gjithë palët e interesuara që të punojnë më shumë për garantimin e sigurisë së gazetarëve në Shqipëri, veçanërisht duke pasur parasysh digjitalizimin e shpejtë të shërbimeve publike dhe centralizimin e të dhënave personale në platformën e-albania”.
Edmondi e ka denoncuar këtë situatë pranë Komisionerit për të Drejtën e Informimit dhe Mbrojtjen e të Dhënave Personale, të cilit i ka drejtuar një ankesë për shkelje të të dhënave personale. Ai e referoi çështjen edhe në Prokurorinë e Rrethit Gjyqësor Tiranë për të vlerësuar nëse veprimet e zotit Bajri përbëjnë apo jo vepër penale.
Rrjeti Gazetarët e Sigurt janë të shqetësuar për shkeljen e të dhënave personale të një gazetari dhe shkeljen e sigurisë ndaj tij dhe familjes së tij. Ne kërkojmë nga Komisionerit për të Drejtën e Informimit dhe Mbrojtjen e të Dhënave Personale që të hetojë rastin dhe të jap transparencë të plotë në lidhje me çështjen siç duhet dhe me shpejtësi. Gjithashtu presim që Prokuroria e Rrethit Gjyqësor Tiranë të bëjë një hetim dhe të sigurojë që ky të mos bëhet precedent që noteri publik ose kushdo mund të shkelë të dhënat personale dhe t’i përdorë ato si mjete kërcënimi apo presioni.
Çdo sulm ndaj gazetarëve është sulm ndaj interesit publik, demokracisë dhe të drejtave të të gjithë qytetarëve.
Prishtinë – Shkup – Sarajevë – Zagreb – Beograd – Podgoricë – Tiranë, 30 Prill 2022
Asociacioni i Gazetarëve të Kosovës
Shoqata e Gazetarëve të Maqedonisë
Shoqata e Gazetarëve të BiH
Shoqata e Gazetarëve Kroatë
Shoqata e Gazetarëve të Pavarur të Serbisë
Sindikata e Mediave të Malit të Zi