Ambasadori Braathu premton përkrahje për AGK-në

Photo by AJK

PRISHTINË 21.09.2018 – Kryetarja e AGK-së, Gentiana Begolli – Pustina është pritur sot në një takim pune nga udhëheqësi i misionit të OSBE-së në Kosovë, ambasadori Jan Braathu.

Kryetarja Begolli- Pustina e njoftoi ambasadorin Braathu me zhvillimet e fundit në AGK dhe strukturën e saj të re, e dalë nga Kuvendi i fundit zgjedhor. Më tej, kryetarja Begolli – Pustina e informoi ambasadorin Braathu me aktivitetet dhe projektet aktuale të AGK-së dhe planet e synimet për të ardhmen.

Në takim u kërkua intensifikimi i bashkëpunimit ndërmjet AGK-së dhe misionit të OSBE-së dhe realizimi i aktiviteteve të përbashkëta që lidhen me sigurinë e gazetarëve, gazetarinë hulumtuese dhe avokimin e lirisë së shprehjes.

Nga ana e tij, Ambasadori Braathu përgëzoi edhe një herë kryetaren Begolli-Pustina për detyrën e re dhe shprehu gatishmërinë dhe vullnetin që misioni i OSBE-së të përkrahë fuqishëm punën dhe angazhimet e AGK-së.

Ambasadori Braathu çmoi lartë rolin e organizatave profesionale dhe të pavarura në zhvillimin e demokracisë dhe shpalosi disa nga mundësitë e bashkëpunimit dhe përkrahjes për AGK-në.


Association of Journalists of Kosovo , Pristina, 21/09/2018