Më 17 nëntor 2025, SCiDEV, në bashkëpunim me Faktoje dhe me mbështetjen e Ambasadës së Mbretërisë së Holandës, zhvilloi në Tiranë një tryezë të nivelit të lartë për të diskutuar vlerësimin e Komisionit Evropian 2025 mbi lirinë e shprehjes dhe lirinë e medias në Shqipëri. Takimi mblodhi gazetarë, deputetë, rregullatorë, shoqëri civile dhe partnerë ndërkombëtarë për të analizuar arsyet pse vendi vijon të shënojë vetëm progres të kufizuar në këtë fushë. Diskutimi theksoi një mesazh kryesor: sfidat që KE identifikon çdo vit nuk janë probleme të izoluara, por simptoma të një ekosistemi mediatik të kapur në mënyrë strukturore.
Pjesëmarrësit analizuan çështjet kryesore të ngritura në Raportin e KE 2025, përfshirë përqendrimin e pronësisë mediatike, mungesën e pavarësisë institucionale, mungesën e transparencës në reklamat shtetërore, çështjet e sigurisë dhe kushtet e punës së gazetarëve, si edhe ndikimin në rritje të propagandës dhe dezinformimit. Ata theksuan se Shqipëria duhet të përafrohet me standardet e BE-së dhe Këshillit të Europës, veçanërisht përmes dekriminalizimit të shpifjes, miratimit të masave anti-SLAPP, dhe garantimit të pavarësisë reale të AMA-s dhe RTSH-së. U shprehën gjithashtu shqetësime për përdorimin e fondeve publike për të ndikuar linjat editoriale, barrierat në aksesin ndaj informacionit, dhe përhapjen e gjuhës së urrejtjes dhe fushatave të koordinuara kundër gazetarëve.
Duke parë përpara, tryeza theksoi se viti 2026 duhet të shënojë kalimin nga përmirësimet graduale te reforma strukturore. Prioritetet përfshijnë transformimin e modelit financiar të medias, garantimin e transparencës së plotë në funksionimin e mediave dhe institucioneve shtetërore, forcimin e mekanizmave të integritetit redaksional dhe përmirësimin e mbrojtjes ligjore dhe ekonomike për gazetarët. Pjesëmarrësit nënvizuan se progresi kërkon veprim të koordinuar nga institucionet, aktorët mediatikë, shoqëria civile dhe partnerët ndërkombëtarë, por edhe presion të qëndrueshëm nga poshtë-lart nga gazetarët dhe publiku për të garantuar llogaridhënie dhe pavarësi reale të medias.
Për një pasqyrë të detajuar të diskutimit, lexoni përmbledhjen e plotë.