Sulme ndaj medias dhe organizatave mediatike, News24, BalkanWeb, Panorama dhe Gazeta Shqiptare, 09.08.2025, Tiranë

Translations: English 

Në orët e para të 9 gushtit 2025, Policia e Shtetit zhvilloi një operacion që kishte si objektiv mediat e Focus Media Group në Tiranë, News24, BalkanWeb, Panorama dhe Gazeta Shqiptare. Policia rrethoi ndërtesën, ndërpreu furnizimin me energji elektrike dhe pengoi gazetarët të hynin në redaksitë e tyre, duke shkaktuar ndalimin e përkohshëm të transmetimit të News24. Stacioni rifilloi transmetimin përmes kanalit të tij në YouTube në orën 10:00 të mëngjesit.

Ndërtesa, raportohet të jetë pjesë e një mosmarrëveshjeje pronësie me kompaninë shtetërore të armatimit KAYO, e cila kohët e fundit ka marrë pronësinë. Deri më tani, nuk është bërë publike asnjë dokumentacion ligjor zyrtar apo njoftim paraprak që të justifikojë operacionin policor. Veprimi u zhvillua në orët e para të një të shtune, një kohë kur numri i stafit dhe vëmendja publike janë zakonisht të ulëta. Autoritetet nuk kanë dhënë deklarata për të sqaruar bazën ligjore ose kohëzgjatjen e operacionit.

Pavarësisht çështjeve të brendshme apo redaktuese brenda Focus Media Group, kjo ndërhyrje e paprecedentë e policisë ngre shqetësime serioze dhe kërkon vëmendje urgjente nga të gjithë mbrojtësit e lirisë së medias dhe parimeve demokratike.

*******

Përditësim mbi rastin

11 Gusht – Sipas Panorama.al, Inspektorati Kombëtar për Mbrojtjen e Territorit (IKMT) rrëzoi urën që lidh ndërtesat e News24 dhe Panorama TV, duke dëmtuar kabllot e transmetimit dhe duke ndikuar në serverat dhe arkivin. Media raporton se kjo ndodhi ndërsa gazetarët po protestonin jashtë. Gazetarë dhe punonjës te medias Focus Media Group, së bashku me gazetarë të tjerë, përfaqësues të shoqërisë civile dhe mbështetës, protestuan më 11 gusht kundër pengimit, duke kërkuar rifillimin e punës dhe respektimin e të drejtës së tyre për të punuar.

11 gusht pas orës 17:00 – Redaksia e News24 bëri thirrje urgjente drejtuar institucioneve diplomatike, ambasadave, partive politike, deputetëve dhe organeve të zbatimit të ligjit, duke paralajmëruar se të dhënat dhe dosjet hetimore, veçanërisht ato mbi korrupsionin, po merren me forcë nga kompjuterët e gazetarëve. Kjo jo vetëm që rrezikon dëshmi të rëndësishme, por edhe sigurinë e gazetarëve dhe burimeve të tyre. Media kërkon ndalimin e menjëhershëm të këtyre sekuestrimeve dhe apelon për një mbrojtje më të fortë të lirisë së mediave dhe sigurisë së gazetarëve, duke theksuar rolin thelbësor të medias së pavarur në demokraci.

12 gusht – Situata vazhdon të përshkallëzohet:
Sipas Focus Media Group, Inspektorati Kombëtar i Mbrojtjes së Territorit (IKMT) ka shembur një urë që lidhte zyrat e News24 dhe Panorama TV, duke dëmtuar kabllot e transmetimit dhe duke ndikuar në serverët dhe arkivat, pavarësisht thirrjeve për vetëpërmbajtje dhe respektim të procedurave ligjore. Raportime lokale nga gazetarët dhe pamje të drejtpërdrejta nga mbrëmja e 11 gushtit tregojnë se kompjuterë, dosje të gazetarëve dhe materiale të tjera pune po nxirreshin nga zyrat e News24 duke përdorur kamionë të ushtrisë, pa ndjekur procedurat ligjore, pa inventar të plotë dhe pa praninë e përfaqësuesve të kompanisë. Ndër materialet e sekuestruara, një përfaqësues i mediave të Focus Media ka deklaruar se ndodheshin edhe dosje që lidhen me hetime të ndjeshme për korrupsion.

Mbrëmë, gazetarët Osman Stafa dhe Isa Myzyraj ishin në vendngjarje duke kërkuar nga forcat e policisë të tregonin një urdhër/mandat zyrtar për këtë procedurë, por u përballën me rezistencë dhe nuk u paraqit asnjë dokumentacion i tillë zyrtar. Raportime dhe pamje të drejtpërdrejta tregojnë se materiale zyrash, tavolina, kompjuterë dhe pajisje të tjera po nxirreshin nga ndërtesat ku operonin mediat e grupit Focus. Kjo duket të jetë një sekuestrim arbitrar i pajisjeve të redaksisë pa garanci ligjore. Mosmarrëveshja administrative dhe kontraktuale mbi qiranë nuk mund të justifikojë humbjen ose komprometimin e mundshëm të materialeve dhe burimeve të ndjeshme gazetareske, gjë që rrezikon gazetarët dhe burimet e tyre. Ende mungon transparenca nga autoritetet lidhur me këtë proces.

Botuesi Irfan Hysenbelliu ka deklaruar publikisht sot se News24 “nuk do të mbyllet” dhe se Focus Media Group “nuk do të lejojë dhunë apo presion për të heshtur zërin tonë”. Ai i ka përshkruar veprimet si të paligjshme dhe të paprecedentë, ka bërë thirrje që gazetarët të qëndrojnë të palëkundur dhe ka apeluar tek institucionet shtetërore të ndalin masat represive dhe të rikthejnë aksesin dhe transmetimin. Bordi i Focus Media Group ka bërë thirrje komunitetit ndërkombëtar të veprojë urgjentisht për të mbrojtur median e pavarur në Shqipëri.

12 Gusht – Pasdite:

Gjykata e Shkallës së Parë në Tiranë pranoi pjesërisht kërkesën e Focus Media News dhe Panorama Group për masa të përkohshme pas operacionit policor të 9 gushtit, i cili bllokoi hyrjen në ambientet e tyre, ndërpreu furnizimin me energji elektrike dhe largoi pajisjet e redaksisë.
Ndërsa gjykata nuk u shpreh mbi mosmarrëveshjen pronësore, e cila mbetet nën juridiksionin e gjykatave administrative, ajo u fokusua gjerësisht në ndikimin e ndërhyrjes mbi aftësinë e gazetarëve për të punuar dhe të drejtën e tyre për të ofruar informacion.

Gjykata theksoi se:
• Interesat tregtare private të kompanive mediatike duhet të dallohen qartë nga të drejtat e gazetarëve dhe mbrojtja e punës së tyre.
• Ndërhyrja dhe kufizimet e vendosura ndaj gazetarëve nuk ishin proporcionale me situatën apo nevojën për veprim, dhe mosmarrëveshje të tilla duhet të zgjidhen në një mënyrë që minimizon ndërhyrjen në lirinë e shprehjes dhe të drejtat e gazetarëve.
• Ndërsa shteti ka të drejtë të mbrojë interesat e tij, ai ka gjithashtu një detyrim ndërkombëtar si vertikalisht (shtet ndaj qytetarit), ashtu edhe horizontalisht (midis aktorëve privatë), për të garantuar lirinë e shprehjes.
• Gazetarëve duhet t’u lejohet të marrin sendet e tyre personale dhe materialet e punës.

Pikat kryesore të vendimit:
• Brenda 24 orëve: Zyra e Përmbarimit Shtetëror duhet të identifikojë dhe inventarizojë të gjitha sendet personale dhe dokumentet e lidhura me punën e gazetarëve, përfshirë skedarët elektronikë, dhe t’ua kthejë ato gazetarëve.
• Brenda 48 orëve: Zyra e Përmbarimit duhet të inventarizojë pajisjet dhe asetet e luajtshme të Focus Media News dhe ose t’i vendosë ato në ruajtje, ose t’i lejojë kompanisë t’i tërheqë.
• Gazetarët duhet të kenë qasje të sigurt në materialet e tyre profesionale për të mbrojtur burimet konfidenciale dhe hetimet në vijim.
• Gjykata gjeti shprehimisht se kufizimet mbi aksesin e gazetarëve ishin joproporcionale dhe në kundërshtim me detyrimet kushtetuese dhe nenin 10 të KEDNJ-së.
• Kërkesa të tjera, si rikthimi i plotë në ambientet e punës, u rrëzuan për shkak të litispendencës me procesin gjyqësor administrativ në vijim.

Burimi.

13 Gusht

Raporte të besueshme tregojnë se vendimi i Gjykates nuk po zbatohet plotësisht. Gazetarët dhe punonjësit e medias kanë raportuar pengesa të vazhdueshme në hyrje të godinës së Grupit Panorama. Hyrja është bërë me kushte dhe, në disa raste, pretendohet se lejohet vetëm pas dorëzimit të pajisjeve celulare para hyrjes. Ky veprim paraqet rreziqe të konsiderueshme për mbrojtjen e burimeve gazetareske.

Përfaqësuesit ligjorë të Focus Media Group paraqitën një ankesë zyrtare pranë Policisë së Shtetit, Komisariati Nr. 1, duke kërkuar veprim të menjëhershëm për zbatimin e vendimit gjyqësor. Raportet tregojnë se kompania shtetërore KAYO, e përfshirë në mosmarrëveshje, së bashku me Policinë Ushtarake, po pengojnë zbatimin e plotë të vendimit.

Për t’i adresuar këto çështje, Focus Media Group ka angazhuar avokatin Jordan Daci për të ndihmuar gazetarët në ndjekjen e procedurave ligjore lidhur me shkeljet e të drejtave të tyre për të punuar dhe mbrojtjen e burimeve gazetareske.

Burimi

15 Gusht

Më 15 gusht, deputetja Ina Zhupa kërkoi shpjegime nga autoritetet mbi bazën ligjore të bllokimit të transmetimeve, kufizimit të aksesit dhe sekuestrimit të materialeve dhe pajisjeve të gazetarëve. Përfaqësuesi i OSBE-së për Lirinë e Medias shprehu shqetësim, duke theksuar se mosmarrëveshjet e pronës nuk duhet të çojnë në ndalimin e transmetimeve. Ndërkohë, gazetari Isa Myzyraj dhe Asociacioni i Gazetarëve të Shqipërisë (AGSH) janë përballur me sulme homofobike dhe denigruese nga një portal, duke nxitur reagime të forta dhe solidaritet nga organizatat rajonale dhe ndërkombëtare për lirinë e medias. Komisioneri për Mbrojtjen nga Diskriminimi dënoi aktet e intimidimit dhe njoftoi për një hetim ex officio të mundshëm, pas së cilës i njëjti portal filloi ta shënjestrojë edhe vetë Komisionerin.

18 Gusht

Më 18 gusht në mëngjes, News24 rifilloi transmetimin nga studio të improvizuara, të reja. Megjithatë, në ambientet origjinale, bllokada policore vazhdon. Gazetarët mbeten të penguar të hyjnë për të marrë materialet e tyre, dhe vendimi i 12 gushtit i Gjykatës së Rrethit Tiranë, që urdhëron kthimin e pajisjeve të redaksisë dhe aksesin për stafin, ende nuk është zbatuar, sipas raportimeve të gazetarëve. Ekipi ligjor i News24 po mbështet aktualisht të paktën 33 gazetarë për të ngritur padi lidhur me shkeljen e pajisjeve dhe materialeve të tyre gazetareske, duke përfshirë shqetësimet mbi ekspozimin e burimeve konfidenciale dhe pengimin e punës hetimore. I njëjti ekip ligjor ka njoftuar gjithashtu Gjykatën Evropiane të të Drejtave të Njeriut mbi rastin, sipas raportimeve nga terreni.

1 Shtator

Punonjësit e Panorama Group, që përfshin Panorama TV, gazetën Panorama, Panorama Sport dhe platformat e tyre online, kanë drejtuar një letër të hapur organizatave ndërkombëtare, ambasadave dhe institucioneve që mbrojnë lirinë e shtypit. Ata kërkojnë ndërhyrje të menjëhershme, mbrojtje dhe mbështetje për t’u rikthyer në ambientet e punës. Stafi thekson se kjo nuk është thjesht një sulm ndaj një redaksie të vetme, por një betejë thelbësore për sundimin e ligjit, drejtësinë dhe të drejtën e publikut për të pasur qasje të lirë në informacion. Ata u bëjnë thirrje komunitetit diplomatik dhe ndërkombëtar të mbështesë parimet e gazetarisë së pavarur.

Policia e Shtetit iu përgjigj një letres së përbashkët nga Rrjeti SJN, MFRR dhe RSF lidhur me zbatimin e një vendimi gjyqësor. Ajo sqaroi se nuk është përgjegjëse për ekzekutimin e vendimit të fundit të gjykatës që lidhet me kthimin e sendeve dhe pajisjeve që u përkasin gazetarëve të Fokus Media. Policia deklaroi se mund të asistojë vetëm përmbaruesit nëse merr një kërkesë zyrtare me shkrim nga Shërbimi i Përmbarimit; megjithatë, në këtë rast nuk është bërë asnjë kërkesë e tillë. Për rrjedhojë, përgjegjësia për ekzekutimin e vendimit të gjykatës i takon Shërbimit të Përmbarimit.

Përgjigjen e plotë në shqip mund ta gjeni këtu.