Kuvendi i Shqipërisë po shqyrton një projektligj që propozon ndryshime në Kodin Penal, të cilat do të kishin pasoja të drejtpërdrejta për lirinë e shprehjes, lirinë e medias dhe sigurinë e gazetarëve. Nisma përfshin propozime për dekriminalizimin e fyerjes dhe shpifjes, forcimin e mbrojtjes penale ndaj dhunës dhe kërcënimeve që synojnë gazetarët, si dhe rishikimin e dispozitave që lidhen me pengimin e lirisë së shprehjes dhe veprimtarisë mediatike.
Prej shumë vitesh, Rrjeti SafeJournalists ka avokuar në mënyrë të vazhdueshme për dekriminalizimin e shpifjes dhe për mbrojtje të posaçme ligjore të gazetarëve ndaj dhunës, kërcënimeve dhe intimidimit të lidhur me punën e tyre, duke i njohur këto çështje si thelbësore për mbrojtjen e gazetarisë në interes publik dhe të debatit demokratik. Këto shqetësime janë pasqyruar në raporte, njoftime dhe advokim politik në mbarë rajonin, duke nxjerrë në pah efektin frikësues të shpifjes penale dhe nevojën për përgjigje ligjore efektive ndaj sulmeve kundër gazetarëve.
Këto çështje kanë qenë në qendër të shqetësimeve të kahershme të ngritura nga Rrjeti SafeJournalists, gazetarët, organizatat mediatike dhe shoqëria civile në Shqipëri, veçanërisht në lidhje me efektin frikësues të shpifjes penale, mungesën e mbrojtjes efektive ndaj intimidimit dhe sulmeve ndaj gazetarëve, si dhe rrezikun që dispozitat penale të paqarta të keqpërdoren kundër raportimit në interes publik. Debati aktual legjislativ zhvillohet në kontekstin e procesit të anëtarësimit të Shqipërisë në Bashkimin Evropian, veçanërisht në kuadër të Kapitullit/Cluster 1 – Themeloret dhe Udhërrëfyesit për Sundimin e Ligjit, ku liria e shprehjes dhe liria e medias mbeten kritere kyçe.
Në këtë kontekst, SCiDEV, duke u mbështetur edhe në të dhënat e Rrjetit SafeJournalists, ka publikuar një analizë të detajuar ligjore të projektligjit, duke shqyrtuar përputhshmërinë e tij me Nenin 10 të Konventës Evropiane për të Drejtat e Njeriut, standardet e Këshillit të Evropës dhe jurisprudencën e Gjykatës Evropiane për të Drejtat e Njeriut. Analiza e vlerëson në tërësi drejtimin e reformës, ndërsa identifikon fusha ku formulimi më i qartë dhe saktësia ligjore do të ndihmonin që mbrojtjet e së drejtës penale të forcojnë sigurinë e gazetarëve pa krijuar rreziqe të reja për lirinë e shprehjes apo gazetarinë në interes publik.
Lexoni analizën e plotë të SCiDEV mbi ndryshimet e propozuara në Kodin Penal (e disponueshme në anglisht dhe shqip).