Djegia e makinës së gazetarit Sami Curri në Bulqizë ka ngritur sërish shqetësime mbi sigurinë e gazetarëve lokalë në Shqipëri dhe nevojën për një reagim të shpejtë institucional.
Më 4 maj 2026, përfaqësues të organizatave mediatike, shoqërisë civile dhe partnerëve ndërkombëtarë, të koordinuar nga SCiDEV, u takuan në Bulqizë dhe Peshkopi për të diskutuar rastin, për të shprehur solidaritet me Currin dhe për të theksuar rëndësinë e ndjekjes së koordinuar nga autoritetet kompetente.
Vizita nisi në redaksinë e Bulqiza Ime, ku punon gazetari Sami Curri dhe drejton median lokale. Pjesëmarrësit shprehën mbështetje për Currin dhe redaksinë, duke i inkurajuar të vijojnë raportimin në interes publik. Rasti u diskutua në kontekstin e presioneve me të cilat përballen gazetarët lokalë, veçanërisht kur raportojnë mbi qeverisjen vendore, industrinë minerare, kushtet e punës dhe ndikimin në mjedis.
Curri falënderoi pjesëmarrësit për mbështetjen dhe theksoi se rasti duhet të hetohet me seriozitet maksimal. Ai u shpreh se zbardhja e plotë është e nevojshme jo vetëm për drejtësi në rastin e tij, por edhe për të dhënë një mesazh se sulmet dhe intimidimi ndaj gazetarëve nuk mund të tolerohen. Ai bëri gjithashtu thirrje për mbështetje më të fortë për mediat dhe gazetarët lokalë në Shqipëri, të cilët shpesh punojnë në kushte të vështira dhe me mbrojtje të kufizuar.
Pas takimit në Bulqizë, SCiDEV lehtësoi një diskutim pune në Peshkopi me përfaqësues të Ministrisë së Brendshme, Policisë së Shtetit dhe Prokurorisë së Juridiksionit të Përgjithshëm Dibër, së bashku me aktorë të medias dhe shoqërisë civile, përfshirë Asociacionin e Gazetareve te Shqiperise, BIRN Albania, Amfora, si dhe përfaqësues nga Delegacioni i BE-së, Këshilli i Evropës dhe Ambasada e Mbretërisë së Holandës.
Diskutimi u përqendrua në trajtimin e rastit dhe nevojën për përdorimin e mekanizmave ekzistues për mbrojtjen e gazetarëve. Pjesëmarrësit theksuan se rastet që përfshijnë gazetarë kërkojnë trajtim të koordinuar nga prokuroria dhe policia, veprime hetimore në kohë dhe ndjekje të vazhdueshme.
Përfaqësuesit e institucioneve ligjzbatuese konfirmuan angazhimin e tyre për rastin dhe për zbatimin e procedurave përkatëse. Ky angazhim u mirëprit si një bazë e rëndësishme për avancimin e reagimit institucional. Pjesëmarrësit theksuan se rasti duhet të trajtohet me seriozitetin e duhur kur një sulm mund të lidhet me punën gazetareske.
SafeJournalists Network rikujton se sulmet ndaj gazetarëve duhet të hetohen në mënyrë të shpejtë, të plotë dhe efektive, duke marrë në konsideratë çdo lidhje të mundshme me punën e tyre. Rrjeti do të vazhdojë të monitorojë rastin dhe pret që autoritetet të sigurojnë ndjekje të qëndrueshme deri në zbardhjen e plotë të incidentit dhe vënien përpara drejtësisë të përgjegjësve.
