Претседателката на Независното здружение на новинари на Војводина (НЗНВ), Ана Лалиќ Хегедиш, доби закана со смрт, а новинарката на порталот Nova.rs, Ана Марковиќ, беше физички нападната на протестот „Стоп, Србија“.
Лалиќ Хегедиш ја добила заканата преку Facebook. Заедно со заканата со смрт, новинарката била навредена и со сексистички израз. Имено, лицето зад профилот, Миленко Протиќ, ѝ испратил порака на новинарката во средата со следната содржина: „К*рво, ќе бидеш заклана.“ Адвокатот на НЗНВ ги пријавил заканите до Специјалното обвинителство за високотехнолошки криминал, кое одговорило дека ќе го испита целиот случај во текот на денот.
Ана Лалиќ Хегедиш вели дека не е невообичаено да добива заканувачки пораки и дека не знае што би можело да предизвика таква закана.
„Реагираме кога има директна закана со смрт како оваа, па адвокатот на НЗНВ веднаш ја пријави заканата. Токму што добив повик од Одделението за високотехнолошки криминал, кои, како што велат, ќе ѝ наредат на полицијата да го испита целиот случај во текот на денот. Како што реков, за жал, ова е повеќе или помалку просечен ден во мојот живот во последните неколку години“, вели Ана Лалиќ Хегедиш.
Таа додава дека има впечаток дека институциите конечно почнуваат посериозно да ги сфаќаат заканите кон новинарите и брзо реагираат, но дека работите се заглавуваат кога треба да се пронајдат и уапсат сторителите.
„Буквално имам само два случаи што стигнаа до суд, од безброј пријавени случаи. Имаме и случај кога човек избегал од полицијата од куќен притвор и сè уште не е пронајден, ниту пак имаме информации дали некој го бара. Очигледно е дека е на слобода“, вели новинарката.
Новинарката на Nova S, Ана Марковиќ, денеска беше нападната на протестот „Стоп, Србија“ кај Факултетот за драмски уметности во Нов Белград, каде што дојде до конфликт меѓу демонстранти и возачи. Како знак на протест, граѓаните го блокираа крстосницата кај факултетот 15 минути, што предизвика реакција кај некои возачи.
Еден од возачите, видно револтиран, ја удрил новинарката на Nova.rs која го снимала настанот, со тупаница по подлактицата и ѝ го фрлил телефонот на земја. „Луѓето кои беа присутни веднаш застанаа во моја одбрана, велејќи им да ме остават на мира. Присутните се обидоа да им објаснат на возачите зошто се запрени на улицата, но некој повторно почна да ги удира, па потоа се повлече. И покрај околностите, никој од присутните не се помести од своето место“, вели Ана Марковиќ.
Коалицијата за медиумска слобода и мрежата SafeJournalists најостро ја осудуваат новата закана со смрт упатена кон претседателката на Независното здружение на новинари на Војводина, Ана Лалиќ Хегедиш, и физичкиот напад врз новинарката на Nova S, Ана Марковиќ. Очекуваме надлежните институции да ги преземат сите мерки во рамките на своите надлежности и што побрзо да го решат случајот со заканите кон Ана Лалиќ и насилството врз новинарката Ана Марковиќ. Особено е важно случајот со директната закана со смрт итно да се процесира и реши, имајќи го предвид претходното искуство и грешките на надлежните органи кои овозможија обвинетиот да избега од куќен притвор. На овој начин, правосудството мора да испрати директна порака до напаѓачите дека заканите со смрт и физичките напади не можат и нема да останат неказнети.
Потсетуваме дека заканите сè почесто се проследени со навредливи сексистички коментари, кои стануваат речиси редовна форма на говор на омраза кон новинарките. Иако предизвикуваат огромни последици, ваквите случаи за жал остануваат во сенка на посериозните закани и напади, не се доволно препознаени од надлежните институции и нема одговорност за нив.
Мрежа SafeJournalists: Здружение на новинари на Косово, Здружение на новинари на Македонија, Здружение на новинари на Босна и Херцеговина, Хрватско новинарско друштво, Независно здружение на новинари на Србија, Синдикат на медиумите на Црна Гора
Коалиција за медиумска слобода: Здружение на медиуми, Здружение на онлајн медиуми (AOM), Независно здружение на новинари на Војводина (НЗНВ), Независно здружение на новинари на Србија (НУНС), Деловно здружение на локални и независни медиуми „Локална Преса“, Фондација „Славко Ќурувија“ и Грански синдикат за култура, уметност и медиуми „Независност“