Rrjeti SafeJournalists dënon ashpër edhe një tjetër sulm ndaj gazetarëve të N1. Sot, ndërsa një ekip televiziv i N1 po xhironte një zonë pranë Parlamentit të Serbisë, një i ri iu afrua dhe kërkoi që ata të ndalonin xhirimet. Pak më vonë, i njëjti person mori kamerën dhe e hodhi disa herë në tokë, duke e shkatërruar atë.
Policia, e cila ndodhej pranë vendngjarjes, nuk reagoi ndaj incidentit, por tha se do të vinte një ekip tjetër, të cilit duhej t’i raportohej rasti. Kur u shfaq ekipi i dytë, anëtarëve të sekretariatit të NUNS-it që ishin të pranishëm iu tha se kishin marrë informacion nga prokuroria se nuk do të kryhej hetim në vendngjarje, ndërsa ekipit të N1 iu kërkua të largohej dhe ta raportonte rastin në komisariatin kompetent. Kur përfaqësuesit e NUNS-it pyetën se cila prokurori kishte marrë një vendim të tillë, oficerët e policisë thanë se nuk e dinin saktësisht dhe se do të ktheheshin së shpejti me këtë informacion. Më pas, NUNS mori informacion se ende nuk ishte vendosur nëse do të kryhej hetim, dhe pas disa minutash një patrullë siguroi vendngjarjen deri në mbërritjen e një ekipi që kreu hetimin. Hetimi u përfundua dhe prokuroria u njoftua. Sulmuesi u largua nga vendngjarja.
Shoqata e Pavarur e Gazetarëve të Serbisë (NUNS) thekson se që nga fillimi i vitit është regjistruar një numër rekord sulmesh fizike ndaj gazetarëve dhe rithekson se në Serbi nuk ka parandalim të qëndrueshëm apo mbrojtje sistematike për gazetarët. Sulmet mbeten të pandëshkuara, hetimet zgjasin me vite dhe mesazhi që përcillet është se dhuna ndaj gazetarëve lejohet.
Veçanërisht shqetësues është fakti që oficerët e policisë shpesh janë të pranishëm në vendngjarje dhe nuk reagojnë. Mungesa e sanksioneve vetëm sa e thellon problemin e mosndëshkimit dhe pasigurinë e kushteve në të cilat punojnë gazetarët.
NUNS beson se një trajtim i tillë ndaj gazetarëve është pasojë e shënjestrimit të tyre nga politikanët, kryesisht nga ata të koalicionit qeverisës, dhe kujton se disa ditë më parë ministri i Informacionit dhe Telekomunikacionit, Boris Bratina, i akuzoi gazetarët e N1 dhe Nova S se janë “fajtorë për shumë gjëra” dhe se nuk duhet të “ekzistojnë në eterin e shtetit”.
Rrjeti SafeJournalists i bashkohet NUNS-it në dënimin e fortë të këtij sulmi të radhës ndaj punonjësve të medias në Serbi. Rrjeti kërkon që institucionet kompetente të kryejnë hetimin, të zhvillojnë procedurën dhe të ndëshkojnë autorin.
Rrjeti SafeJournalists do të informojë aktorët përkatës kombëtarë dhe ndërkombëtarë për këtë rast.
Çdo sulm ndaj gazetarëve është një sulm ndaj demokracisë, interesit publik dhe të drejtave themelore të njeriut.
Prishtinë – Shkup – Sarajevë – Zagreb – Beograd – Podgoricë – Tiranë, 20 nëntor 2025
Shoqata e Gazetarëve të Kroacisë
Shoqata e Gazetarëve të Kosovës
Shoqata e Gazetarëve të Maqedonisë
Shoqata e Gazetarëve të Bosnjë dhe Hercegovinës
Shoqata e Pavarur e Gazetarëve të Serbisë
Sindikata e Medias e Malit të Zi