СКОПЈЕ, 14.12.2017 – Политизацијата и длабоката поделба на медиумскиот сектор ја разниша довербата на граѓаните во медиумите, од кои 66,3 проценти сметаат дека во медиумите има пропаганда, 57,9 дека користат говор на омраза и 52,4 дека се корумпирани. Шеесет проценти од граѓаните се убедени дека медиумите немаат влијание врз нивните ставови, додека половина од медиумите очекуваат само да информираат, а не и да понудат решенија.

Ова го покажува истражувањето „Граѓаните и новинарите за професионалноста во медиумите“ изработено во рамки на проектот „Истражувачкото новинарство чувар на демократијата и човековите права“, спроведен од Центарот за управување со промени и Институтот за човекови права.

Според Гоце Пачемски, еден од авторите на истражувањето, сепак 79 од граѓаните веруваат дека медиумите можат да бидат катализатор на промени во општеството.

Јасна Бачовска Недиќ, коавтор на анализата, посочи дека таа покажува дека Македонија е телевизиско општество, каде 47 проценти од граѓаните се информираат од телевизиите.

– Граѓаните најмногу се информираат од приватните телевизии, а растечки тренд имаат интернет-порталите, што водат пред социјалните мрежи. Анализата покажа дека 86,5 проценти од граѓаните имаат пристап до пет или повеќе телевизии – изјави Бачовска Недиќ.

Посочи дека анализата покажала дека новинарите имаат самосвест за кризата и состојбата во медиумите каде 71 процент од новинарите сметаат дека нивниот углед е низок, а високи 89 проценти дека се корумпирани. Таа посочи дека за разлика од тоа, 52,4 проценти од граѓаните се сигурни дека има корупција во медиумите.

Бачовска Недиќ посочи дека интересно е тоа што 76,7 проценти од новинарите сметаат дека не се специјализирани да вршат тематско и истражувачко новинарство, а 92 проценти дека новинарската професија е недоволно платена.

Истражувањето е поделено во две анкети, од кои првата спроведена во периодот од 30 мај до 9 јуни 2017 година на репрезентативен примерок од 1.203 граѓани, додека вториот дел од 27 јуни до 10 јули на 163 новинари. Анкетата е спроведена во Скопје, Битола, Кичево, Куманово и Тетово.

ИЗВОР: www.novamakedonija.com.mk

СКОПЈЕ, 13.12.2017 – Претседателот на Здружението на новинарите на Македонија Насер Селмани, вчера се сретна со евроамбасадорот Самуел Жбогар. На средбата се разговараше за актуелната состојба со медиумите во државата, престојниот закон за медиуми како и подлабочување на соработката.

Селмани му се заблагодари на евроамбасадорот за поддршката на Делегацијата на Европската комисија во Скопје за ЗНМ и за реформите во медиумите. Побара од амбасадорот да ја охрабри Владата за забрзување на процесот на донесување на измените на Законот за аудио и аудиoвизуелни медиумски услуги. Според него, реформите во медиумите се исто толку приоритетни како и реформите во безбедносниот сектор и судството. „Aко нема слободни и професионални медиуми нема кој да го следи процесот на спроведување на реформите во полицијата и судството“, истакна Селмани.

На средбата се разговараше и за состојбата на јавниот сервис и за начините за подобрување на неговата работа.

Евроамбасадорот Жбогар, истакна поддршка за работата на ЗНМ и се заложи за зголемување на взаемната соработка. Според него реформите во медиумите се важни и треба внимателно да се спроведат.

СКОПЈЕ, 04.12.2017 – Здружението на новинарите на Македонија денеска организираше брифинг за претставници на меѓународната заедница во Скопје, во врска со медиумските реформи.

Претседателот на ЗНМ, Насер Селмани побара од претставниците на меѓународната заедница да ја охрабрат Владата да продолжи со медиумските реформи, кои се еден од клучните приоритети. Селмани нагласи дека Владата треба да ги усвои измените и дополнувањата на Законот за аудио и аудиовизуелни медиумски услуги, во кој ќе се вградат и клучните забелешки од новинарските и медиумските организации и да ги достават на усвојување во Парламентот.

„Донесувањето на законот ќе помогне да се создадат подобри услови за работа на медиумите и медиумските работници, но длабоки и суштински реформи ќе треба да следат во наредниот период“, истакна Селмани.

Претставниците на меѓународната заедница изразија подготвеност да го помогнат процесот на реформи во медиумите во кои ќе бидат вклучени сите заинтересирани и засегнати страни.

СКОПЈЕ, 01.12.2017 – Претседателот на Здружението на новинарите на Македонија, Насер Селмани денеска се сретна со министерот за внатрешни работи Оливер Спасовски. На средбата се разговараше за зголемување на безбедноста на новинарите како и за идните можности за соработка меѓу Здружението и МВР.

На средбата Селмани искажа подготвеност да соработува со МВР со цел да се подобрат условите за работа и безбедноста на новинарите. „Сакам да ја искажам нашата подготвеност да помогнеме да изградиме институционален механизам за превенција и казнување на насилството врз новинарите“, рече Селмани и додаде дека треба да се расчистат сите напади врз новинарите кои се случија во последните неколку години.

Селмани предложи организирање на заеднички обуки за слободата на изразувањето и за подобрување на комуникацијата на новинарите и полицијата.

Тој рече дека жали за приведувањето на двајцата камермани од полицијата на почетокот на ноември и изрази надеж дека такви инциденти во иднина нема да се повторат. „Ние сметаме дека до таков инцидент не требаше да дојде и очекуваме МВР во најскоро време да одговори на нашата претставка“, рече Селмани.

Министерот Спасовски истакна подготвеност за блиска соработка со ЗНМ, која наскоро ќе се официјализира со потпишување на Меморандум за соработка. Спасовски со задоволство ја прифати идејата за организирање на заеднички обуки за подигнување на свеста на припадниците на полицијата за важната улога на медиумите во едно демократско општество.

СКОПЈЕ, 28.11.2017 – Денеска во Софија, Бугарија се одржува Конференција посветена на предизвиците со кои се соочуваат медиумите во Југоисточна Европа, организирана од Форумот за медиуми од Југоисточна Европа. На конференцијата учествуваат околу 300 претставници на медиумите, медиумски експерти, претставници на академската заедница и на локални и меѓународни медиумски организации.

На панел дискусијата посветена на лажните вести учествуваше и директорот на ЗНМ, Драган Секуловски, кој истакна дека во регионот се потребни медиуми, кои ќе бидат пример во борбата со лажните вести. „Јавниот радиодифузен сервис, во случајот со Македонија, МРТ, има важна улога во овој контекст и тој треба да послужи како пример како треба да известуваат и другите медиуми“, рече Секуловски.  

Тој смета дека еден од механизмите на долготрајна битка против лажните вести е подигнувањето на свеста и едукацијата на граѓаните за препознавање на лажните вести. „Точно е дека најчесто лажните вести се шират преку онлајн медиумите, но погрешно е да се мисли дека ваквата медиумска содржина може да се регулира со закон. Прекумерната регулација, може да предизвика самоцензура и негативно да се одрази на слободата на говор“, рече Секуловски.

Според него, во Македонија лажните вести во изминатиот период беа креирани од лажни експерти, лажни организации, лажни анкети, лажни протести се со цел креирање на искривена слика за реалноста во општеството и дефокусирање од вистинските проблеми.