Gazetarët afganë Amina Omid, Ahmad Shaker Sangi, Nimatullah Gholami dhe Rafiullah Nikzad të shoqëruar nga Kryetari i Bordit të AGK-së, Xhemajl Rexha dhe Zyrtarja Ligjore e ECPMF-së, Flutura Kusari, kanë mbajtur sot konferencë për medie.

Në konferencën e mbajtur në zyrat e AGK-së, gazetarët afganë janë shprehur mirënjohës për mbështetjen e dhënë nga Qeveria e Republikës së Kosovës dhe gatishmërinë e ECPMF-së dhe AGK-së për t’i ndihmuar ata.

“Falënderoj Qeverinë e Kosovës dhe Asociacionin e Gazetarëve të Kosovës që na kanë krijuar këtë mundësi që të jemi në Kosovë dhe që ta vazhdojmë profesionin tonë të sigurt” – tha Omid, duke shtuar se shpreson që të gjithë gazetarët e Afganistanit, veçanërisht vajzat dhe gratë të jetojnë në liri të plotë ashtu siç jetojnë në Kosovë.

Teksa gazetari, Ahmad Shaker, tha se shumë prej kolegëve të tij janë kërcënuar me jetë dhe se shumë prej tyre janë detyruar të ikin në shtetet tjera.

“Afganistanin e kemi lënë në gjendje të rëndë, mediet atje nuk janë aspak të lira dhe secila medie ka një përfaqësues të talebanëve që i kontrollon. Ata vërtetë e kanë krijuar një gjendje të pasigurt sepse nuk pranojnë asnjë kritikë ndaj pushtetit. Përafërsisht 60 për qind e medieve janë mbyllur dhe gazetarët e kanë lëshuar shtetin. Një pjesë e atyre gazetarëve janë strehuar në shtetet afër Afganistanit, por që po jetojnë një jetë mjaftë të varfër”, tha ai.

Më tej, gazetari Raifullah Nikzad, tha se është shumë i lumtur që gjendet në Kosovë, por njëkohësisht është shumë i shqetësuar për familjen e tij që ka mbetur në Kabul.

“Nga mediet dhe gazetarët e Kosovës ju kërkoj që të trajtojnë më shumë gjendjen e Afganistanit dhe kolegëve të tyre atje, që t’i ndihmojnë atyre që të ushtrojnë profesionin e tyre lirshëm”, tha Nikzad.

Kryetari i Bordit të AGK-së, Xhemajl Rexha, u shpreh i lumtur për ndihmën e dhënë nga shteti për strehimin e gazetarëve afganë në Kosovë, teksa falënderoi edhe kolegët për solidarizimin me ta.

“AGK-ja është shumë e lumtur që të ndihmojë në strehim gazetarët afganë, që janë detyruar të ikin nga shteti i tyre për shkak të situatës politike. Jam falënderues për solidarizimin e komunitetit gazetaresk me ta, dhe ne do të bëjmë gjithçka që mundemi që ata të vazhdojnë ta bëjnë punën e tyre si gazetarë në një ambient të sigurtë”

Flutura Kusari – Zyrtare Ligjore në ECPMF teksa shpjegoi programin dhe benefitet e tij, tha se do të bëhet çdo gjë që kolegët afganë të vazhdojnë punën e tyre si gazetarë.

“Shtëpia jonë është shtëpia e tyre. Do të bëjmë gjithcka që është e mundur që të bëjnë një jëë të mirë dhe të vazhdojnë punën e tyre si gazetare.”, tha Kusari.

Gazetarët afganë u mirëpritën në Kosovë një muaj pas vendimit të Qeverisë për strehimin e tyre, në kuadër të programit “Journalists in Residence – Kosovo”, që është i iniciuar nga ECPMF, e që financohet nga Qeveria e Kosovës dhe mbështetet bujarisht nga Iniciativa Hannah Arendt.

Gazetarëve do t’u sigurohet strehim, pagë mujore, sigurim shëndetësor dhe biletë kthimi, kur rrethanat të krijohen që ata të kthehen në shtëpitë e tyre.

Amina Omid, Ahmad Shaker Sangi, Nimatullah Gholami dhe Rafiullah Nikzad – janë katër gazetarët afganë që kanë mbërritur sonte në Kosovë në kuadër të programit “Journalists in Residence – Kosovo”.

Kolegët afganë u mirëpritën në aeroport nga Kryetari i Bordit të AGK-së, Xhemajl Rexha, Drejtorja Ekzekutive e AGK-së, Getoarbë Mulliqi Bojaj, Zyrtarja Ligjore e ECPMF-së, Flutura Kusari, përfaqësuesi i MPB-së, Kushtrim Nreci dhe zyrtarë të Policisë së Kosovës.

Gazetarët afganë u mirëpritën një muaj pas vendimit të Qeverisë për strehimin e tyre në Kosovë. Gazetarëve do t’u sigurohet strehim, pagë mujore, sigurim shëndetësor dhe biletë kthimi, kur rrethanat të krijohen që ata të kthehen në shtëpitë e tyre.

Programi “Journalists in Residence – Kosovo”, inicuar nga European Centre for Press and Media Freedom ECPMF, e që financohet nga Qeveria e Republikës së Kosovës, për gazetarët ukrainas dhe afganë mbështetet bujarisht nga Iniciativa Hannah Arendt.

Gazetarët dhe kameramanët e medieve kosovare sot janë organizuar spontanisht për të bojkotuar konferencën për shtyp, pas Mbledhjes së Qeverisë. Gazetarët kanë pritur më shumë se 40 minuta për paraqitjen e dy ministrave të Qeverisë, Hekuran Murati dhe Arbërie Nagavci.

AGK-ja, përkrah kolegët gazetarë për veprimin e sotëm, pasi që kjo nuk është hera e parë që Qeveria vonon pa ndonjë shpjegim konferencat.

AGK-ja, gjithashtu i kërkon Qeverisë respektimin e punës së gazetarëve duke organizuar konferencat për shtyp, në një kohë të arsyeshme pas përfundimit të mbledhjeve. Qeveria duhet ta vendosë interesin publik në rend të parë, duke pranuar pyetjet e gazetarëve për vendimet që ajo i merr.

Gazetarët ukrainas sot janë takuar me Kryetarin e Kuvendit të Republikës së Kosovës, Glauk Konjufca, si dhe kanë ndjekur nga afër punimet e seancës së dytë për sesionin pranveror.

Kolegët nga Ukraina janë përshëndetur nga deputetët e pranishëm në Parlament, teksa kanë brohoritur “Slava Ukraina” dhe “Rroftë Kosova”.

Luidmyla Makei, Sehri Shevchenko, Luidmyla Mekh, Maryna Zhyvotkova, Oksana Chykanchy, Viktoriia Kaidash, Iryna Synelnyk dhe Olga Lysnicha, në shoqërimin e Drejtores Ekzekutive të AGK-së, Getoarbë Mulliqi Bojaj dhe Zyrtares Ligjore të ECPMF-së, Flutura Kusari, kanë shprehur mirënjohjen dhe falënderimin e tyre karshi ndihmës së dhënë për ta nga Institucionet dhe populli i Kosovës.

Gazetarët nga Ukraina janë strehuar në Kosovë në kuadër të programit “Journalists in Residence – Kosovo”, që është iniciuar nga European Centre for Press and Media Freedom ECPMF dhe financohet nga Qeveria e Republikës së Kosovës.

Asociacioni i Gazetarëve të Kosovës është njoftuar nga gazetari, Bujar Vitija, për një seri fyerjesh, linçimesh e kërcënimesh që i janë bërë në ditët e fundit, pas një serie shkrimesh rreth dyshimeve për korrupsion në Spitalin Publik të Vushtrrisë.

AGK-ja e dënon gjuhën e përdorur ndaj gazetarit Vitija, dhe konsideron se ajo pengon punën e tij dhe të gazetarëve të tjerë. Të gjitha organet duhet ta bëjnë punën e tyre profesionale, për të zbardhur ngjarjet rreth akuzave të ngritura.

Në një trend alarmues, AGK-ja është njoftuar sot për një tjetër sulm të rëndë kundër gazetarëve që po raportojnë nga veriu i vendit.

Persona të maskuar e kanë sulmuar ekipin e Klan Kosovës në Zubin Potok.

Ekipi i përbërë nga gazetarët Qëndresa Bellagoshi, Drin Demiri, kameramani Agon Bejtullahu dhe shoferi Elsad Sinani, janë sulmuar sot në fshatin Zupç. Gazetarja Bellagoshi dhe shoferi Sinani kanë marrë trajtim mjekësor, pasi që xhamat e veturës së thyer nga gurët i kanë goditur në fytyrë. Teksa, Demiri dhe Bejtullahu kanë shpëtuar pa lëndime.

Për rastin është njoftuar edhe Policia e Kosovës.

Sulmet e vazhdueshme përbëjnë kërcënim serioz për sigurinë e gazetarëve dhe pengojnë raportimin për zhvillimet në veri. Andaj, AGK-ja, kërkon nga KFOR-i dhe EULEX-i që të luajnë rol shtesë për të garantuar sigurinë fizike të gazetarëve, që vazhdojnë të jenë cak i sulmeve të organizuara nga grupe personash të maskuar.