PRISHTINË, 15.01.2020 – Hetimet dhe ndjekjet penale për rastet e kërcënimeve dhe sulmeve ndaj gazetarëve kanë qenë të ngadalshme, thuhet në raportin e publikuar të martën nga organizata ndërkombëtare me seli në New York, Human Rights Watch.

“Kërcënimet dhe sulmet ndaj gazetarëve kanë vazhduar, ndërsa hetimet dhe ndjekjet penale kanë qenë të ngadalshme. Kërcënimet në platformat e mediave sociale mbetën një problem i përhapur. Midis muajve janar dhe shtator, Asociacioni i Gazetarëve të Kosovës regjistroi 11 raste të kërcënimeve dhe dhunës ndaj gazetarëve dhe mediave, përfshirë katër sulme fizike dhe shtatë kërcënime. Policia po hetonte katër nga rastet e raportuara në kohën e shkrimit të këtij raporti.” – shkruan në raportin e 30-të me radhë i cili përfshinë periudhën nga fundi i vitit 2018 deri në nëntor të vitit 2019.

PRISHTINË, 11.01.2020 – Asociacioni i Gazetarëve të Kosovës ka pranuar informatën se ekipi i arbresh.info është sulmuar dje gjatë raportimit të tyre për vizitën e nënkryetarit të Kuvendit të Kosovës, Sllavko Simiq, njëherësh edhe nënkryetar i Listës Serbe, në fshatin Prilluzhë të Komunës së Vushtrrisë.

Sipas raportimeve të arbresh.info, Simiq ka vizituar një shkollë të mesme të ulët dhe më pas të ashtuquajturën Komunën paralele të Prilluzhës. Ekipit të arbresh.info ju pamundësua të jetë i pranishëm për të raportuar ngjarjet, përderisa mediet serbe u lejuan të jenë prezente.

Prishtinë, 20.12.2019 – Asociacioni i Gazetarëve të Kosovës me shqetësim e ka pranuar informatën se drejtori i Drejtorisë së Kulturës në Skenderaj, Ramiz Shala e ka kërcënuar me sulm fizik korrespondentin e gazetës “Zëri”, Kajtaz Gecaj.

Sipas gazetarit Gecaj, kërcënimi ka ndodhur si rrjedhojë e artikullit të publikuar “Sivjet Komuna e Skenderajt pagoi katër portale, asnjëri lokal.”

“Para pak çasteve, Ramiz Shala, drejtor i Kulturës më ka kërcënuar se do të më sulmojë fizikisht nëse edhe njëherë ia përmendi emrin në gazetë, edhe pse emrin ia ka përmendur kolegu i tij, Kastriot Gashi. Bile tha se “tash të kisha bë tokë veç e kam mik të mirë djalin tënd.” – ka shkruar Gecaj në rrjetin social Facebook.

Për më tepër, ky i fundit është kërcënuar se do të dëbohet nga zyra e tij.

“Ai gjithashtu me kërcënoi se nesër (e premtë) do të më dëbojë nga zyra në objektin e ish-TMK-së..” – thuhet në postimin e Gecajt.

AGK e fton drejtorin Shala të distancohet nga kjo qasje e patolerueshme dhe në rast se ka pretendime ndaj shkrimeve të realizuara nga Gecaj, t’i ndjek rrugët ligjore dhe asesi të mos përdorë gjuhë kërcënuese ndaj gazetarit.

AGK inkurajon gazetarët që të mos zbrapsen nga kërcënimet e tilla ndërsa rastet e pengimit në punën e tyre profesionale t’i lajmërojnë gjithsesi edhe në polici.

PRISHTINË, 16.12.2019 – Asociacioni i Gazetarëve të Kosovës i bashkohet thirrjes së gazetarëve dhe medieve shqiptare, organizatave të medias, të shoqërisë civile si dhe organizatave ndërkombëtare, të cilat kërkojnë nga qeveria shqiptare të tërheqë paketën ligjore ‘anti-shpifje’ që i është propozuar Kuvendit.

Me miratimin e ndryshimeve në Ligjin për mediat audiovizuale dhe Ligjin për komunikimet elektronike, Autoriteti i Medieve Shqiptare (AMA) dhe Autoriteti i Komunikimeve Postare dhe Elektronike (AKEP) do të lejohen të bllokojnë menjëherë faqet e internetit të medieve, të vendosin gjoba të papërballueshme për gazetarët dhe penalizime të rënda deri në mbylljen e portaleve.

Edhe përfaqësuesi i OSBE-së për Lirinë e Mediave, Harlem Désir paralajmëroi se “gjobat e tilla mund të çojnë në mbylljen e mediave dhe të shihen si presion indirekt.”

Thirrjes për tërheqjen e dy projektligjeve që kërcënojnë lirinë e shprehjes dhe lirinë e mediave, i janë bashkuar edhe Federatat Evropiane dhe Ndërkombëtare të Gazetarëve (EFJ / IFJ). Sipas tyre propozimet nuk janë në përputhje me praktikat më të mira të vetë-rregullimit dhe do të kishin një ndikim negativ në lirinë e shprehjes në Shqipëri.”

AGK vlerëson se këto dy drafte e censurojnë drejtpërdrejt median online dhe rrezikojnë seriozisht lirinë e shprehjes. E drejta e fjalës, në çdo vend demokratik trajtohet nga kodet e etikës dhe organet vetërregulluese të medias.

PRISHTINË, 11.12.2019- Asociacioni i Gazetarëve të Kosovës ka marrë me shqetësim qasjen e deputetit të Kuvendit të Kosovës, Veton Berisha, ndaj gazetarit të Radio Kosovës, Denis Galushi.

PRISHTINË, 11.12.2019 – Thyerja e zyrave të Asociacionit të Gazetarëve të Kosovës me datën 06.12.2019 ka shqetësuar të gjithë ata që përkrahin gazetarët e që janë në mbështetje të punës së tyre.

Një reagim i tillë ka ardhur edhe nga përfaqësuesi i OSBE-së për Lirinë e Medieve, Harlem Desir. Ai përmes një postimi në Twitter ka shprehur shqetësimin e tij në lidhje me këtë akt, duke kërkuar që përgjegjësit të dalin para drejtësisë.

“I shqetësuar për thyerjen e zyrave të Asociacionit të Gazetarëve të Kosovës më 06.12., gjatë së cilës janë marrë disa mjete. Zyra ime do të përcjellë nga afër hetimet, dhe shpresoj që personat përgjegjës do të dalin para drejtësisë”, ka shkruar Desir në Twitter.

Ky nuk ka qenë reagimi i vetëm për rastin e thyerjes së zyrave të AGK-së. Misioni i OSBE-së në Kosovë, Platforma Rajonale e Ballkanit Perëndimor për Lirinë e Medias dhe Sigurinë e Gazetarëve (SEWP), si dhe mbarë komuniteti i gazetarëve kanë dënuar këtë akt.

Prishtinë, 09.12.2019 – Fituese e çmimit për gazetari kundër korrupsionit për vitin 2019 është shpallur gazetarja Ardiana Thaçi Mehmeti, e cila ka realizuar një seri storjesh në lidhje me nepotizmin dhe korrupsionin në ndërmarrjet publike në Kosovë.

Shkrimi në linkun vijues:
https://jacaward.com/author/ardiana-thaci-mehmeti/