Prishtinë, 06.12.2019- Asociacioni i Gazetarëve të Kosovës njofton opinionin, se zyret e organizatës që gjenden në lokalet e Ndërmarrjes Publike Banesore në rrugën ” Perandori Justinian”, në Prishtinë janë thyer. Aty janë marrë sende me vlerë, të cilat kanë qenë mjete pune të organizatës: një aparat fotografik, një televizor dhe një llaptop.

Për rastin është njoftuar menjëherë Policia e Kosovës dhe në vendin e ngjarjes ka dalë ekipi i Forenzikës për t’i bërë hetimet e nevojshme.

AGK është jashtëzakonisht e shqetësuar me këtë situatë dhe dënon ashpër këtë akt. Duke pas parasysh faktin që përball zyrës së AGK-së është Katedralja “Nënë Tereza”, si dhe lokalet tjera, të cilat kanë kamera përreth, AGK fton Policinë e Kosovës që të angazhohet maksimalisht në gjetjen e kryerësve të kësaj vepre penale.

Pavarësisht kësaj situate AGK mbetet e përkushtuar që ta kryejë misionin e saj e që është mbrojtja e punëtorëve medial dhe avokimi për të drejtat e tyre.

Gazetarët e rajoneve të Pejës dhe të Gjakovës në punëtorinë e parë të AGK dhe UN WOMEN

PRISHTINË, 30.11.2019 – Asociacioni i Gazetarëve të Kosovës në bashkëpunim me UN Women filluan ciklin e punëtorive dy ditore për gazetarët e nivelit lokal, mbi temën “Roli i medieve në ndërtimin e paqes”.

Në punëtorinë e parë po marrin pjesë gazetarët e rajoneve të Pejës dhe të Gjakovës. Ligjëruese është Gjeraqina Tuhina, gazetare shumëvjeçare e cila ka raportuar për luftën e fundit në Kosovë, që nga viti 2000 punon si korrespodente nga Brukseli dhe mbulon temat mbi integrimet evropiane, dialogun Kosovë – Serbi, etj.

Përmes këtij cikli të punëtorive synohet të zgjerohen njohuritë mbi raportimin ndaj konflikteve dhe rolin e medieve në ndërtimin e paqes. Gjithashtu synohet të forcohen kapacitetet e gazetarëve duke aplikuar një qasje sa më korrekte gjatë raportimeve të tyre ndaj konflikteve dhe njëkohësisht të aplikojnë edhe perspektivën gjinore.

Deri në fund të projektit janë planifikuar katër punëtori, të cilat do të udhëhiqen nga ekspertë ndërkombëtar dhe si rezultat i këtyre punëtorive me gazetarë të nivelit lokal dhe trajnimeve me gazetarë të nivelit qendror që veçse kanë filluar, do të hartohet një udhëzues mbi temën e mësipërme.

Prishtinë, 07. 11. 2019 – AGK është e shqetësuar me sulmin fizik ndaj gazetares së Klan Kosovës, Mejreme Gashi në fshatin Karaçevë të Kamenicës, nga persona brenda një kazinoje.

Ekipi i Klan Kosovës ishte duke e realizuar një kronikë për operimin e disa kazinove në vendin e përmendur, kur persona që punonin në një kazino i ka penguar prezenca e medias dhe u janë vërsulur verbalisht dhe më pas e kanë sulmuar fizikisht gazetarën.

”Fillimisht mua dhe Rilindit na janë vërsulur duke na sulmuar verbalisht me fjalët më të rënda, na shanë, na ofenduan me fjalë banale. Pastaj njëri nga ta më goditi pas koke me dorë. E kjo nuk i mjaftoi prapë vazhdoi me sulme verbale ndaj tërë ekipit të Klan Kosovës derisa u shoqërua nga të pranishëm të tjerë duke na thënë ”Ikni nga këtu”, ”Mos na xhironi veturat”, kjo pasi aty kishte njerëz që ushtronin këtë veprimtari”. Ka deklaruar ajo për mediumin në të cilin punon.

Kjo është hera e dytë brenda javës që pengohet i njëjti ekip në kryerjen e detyrës, krahas atij që ndodhi në Zhabar të Mitrovicës, për të cilin AGK ka reaguar.

AGK edhe një herë fton organet e rendit me theks të veçantë policinë dhe prokurorinë që ta trajtojnë rastin me prioritet dhe autorët e sulmit t’i sjellin para drejtësisë. Sulmet ndaj gazetarëve kohëve të fundit kanë marrë përmasa shqetësuese, aq sa e ka bërë këtë si profesion, nga më të vështirët për tu punuar në Kosovë. Për këto dhe arsye tjera, organet e rendit duhet të veprojnë menjëherë për t’iu mundësuar gazetarëve të punojnë pa shqetësime.

Njëherësh, AGK inkurajon gazetarët që të mos dorëzohen përballë kërcënuesve të tillë dhe të punojnë me përkushtim për të informuar publikun.

Prishtinë, 06.11.2019 – Asociacioni i Gazetarëve të Kosovës shpreh shqetësimin e thellë në lidhje me kërcënimin që i është bërë ekipit të Televizionit Klan Kosova, nga një familjar i imamit të xhamisë së Zhabarit, Sead Bejta.

“Nëse publikohet vetëm një sekuencë për këtë rast, ose ti ose unë do të jemi mi tokë”, është kërcënimi që i është bërë ekpit të Klan Kosovës, përderisa ata ishin duke realizuar një storje, ku protagonistë ishin imami Sead Bejta dhe një grua me iniciale S. B.

PRISHTINË, 04.05.2019 – Asociacioni i Gazetarëve të Kosovës në bashkëpunim me UN Women filluan ciklin e trajnimeve për gazetarët e nivelit qendror, mbi temën “Media si një instrument i paqes”.

Trajnimi i parë u organizua së bashku me Ambasadën e Finlandës në Kosovë, ku mori pjesë edhe Ambasadorja Finlandeze, Pia Stjernvall, Kryetarja e Bordit të AGK-së, Gentiana Begolli Pustina dhe Shefja e Zyrës së UN Women, Vlora Tuzi Nushi.

PRISHTINË, 28.10.2019 – Asociacioni i Gazetarëve të Kosovës ka pranuar me shqetësim veprimin e pronarit të një kompanie ndërtuese, Arsim Rexhepi, ndaj gazetares së Ekonomia Online, Norë Kelmendi.

Kelmendi ka qenë duke realizuar një kronikë për një incident në kryeqytet, ku nga shembja e dheut janë dëmtuar disa vetura. Gjatë kryerjes së detyrës, ajo është penguar nga z. Rexhepi, i cili e ka tërhequr për krahu gazetaren, duke e larguar nga vendpunishtja, ani pse ekipi i EO kanë poseduar leje për xhirime nga inspektori i ndërtimit.

PRISHTINË, 26.10.2019 – Linçimi publik i bërë nga zyrtari i Lëvizjes Vetëvendosje, Hysen Durmishi, ndaj drejtorit të televizionit Klan Kosova, Baton Haxhiu, dhe ndaj kryeredaktorit të gazetës online Insajderi, Vehbi Kajtazi, për AGK është shqetësues dhe i papranueshëm.

Përmes një shkrimi në Facebook, Durmishi, ndër të tjerë, ka kërkuar arrestimin e dy gazetarëve.