Kryeqyteti i Kosovës, Prishtina, për herë të parë priti rreth 100 gazetarë e delegatë të asociacioneve e unioneve nga shtetet e Evropës.

Asociacioni i Gazetarëve të Kosovës si anëtar i Federatës Evropiane të Gazetarëve, është nikoqir i takimit të përvjetshëm të kësaj organizate.

Fjalimet hyrëse u bënë nga Kryetari i AGK-së, Xhemajl Rexha, Presidentja e EFJ-së, Maja Sever, Kryetari i Prishtinës, Përparim Rama, si dhe gazetarja ukrainase e strehuar në Kosovë, Lyudmila Makei.

Pas fjalimeve hyrëse, u zhvillua edhe një diskutim për raportimin nga lufta, me panelistë Tim Dawson, Sekretar Gjeneral i Federatës Ndërkombëtare të Gazetarëve, IFJ, Florent Duplouy – Jurist, Platforma e Këshillit të Evropës për Promovimin e Mbrojtjes së Gazetarëve, Wade Goddard, Fotoreporter – War Photo Limited dhe Sergiy Tomilenko, President i Sindikatës Kombëtare të Gazetarëve të Ukrainës, NUJU.

AGK-ja, është jashtëzakonisht e lumtur që po mirëpret në Kosovë rreth 100 gazetarë nga asociacione e unione të 45 shteteve nga Evropa.
Në pjesën e dytë të ditës së parë të Kongresit Vjetor të Federatës Evropiane të Gazetarëve, Platforma Rajonale e Ballkanit Perëndimor, SafeJournalists, prezantoi statistikat e Indeksit të Sigurisë së Gazetarëve në Ballkanin Perëndimor për vitin 2023.

Indeksin për vitin 2023 e prezantuan: Getoarbë Mulliqi – Hulumtuese e SafeJournalists në Kosovë, Tamara Filipović Stevanović – Koordinatore e Projektit SJ në Serbi, Milan Spirovski – Hulumtues i SJ-së në Maqedoninë e Veriut, Borka Rudić – Koordinatore e Projektit në Bosnje dhe Hercegovinë, dhe Dražen Ðurašković – Koordinator i Projektit në Malin e Zi.

European Federation of Journalists – EFJ, vazhdoi më tej me prezantimin e raporteve të punës për vitin 2023, si dhe diskutimin e nevojshëm për takimin vjetor.

Më shumë informata rreth Kongresit Vjetor të EFJ-së, mund të gjeni në faqen zyrtare të Federatës në rrjetin social X. (@EFJEUROPE)

23 gazetarë e studentë të gazetarisë, kanë marrë pjesë në sesionin e dytë të trajnimit “Antigjipsizmi në Kosovë – raportimi i përgjegjshëm dhe etik për komunitetet rom, ashkali dhe egjiptian”.

Pjesëmarrësit nën mentorimin e gazetarit, Lendrit Qeli, u njoftuan për kontekstin historik e social të komuniteteve rom, ashkali dhe egjiptian në Kosovë, të kuptuarit e antigjipsizmit, mediet sociale dhe rrjedhjen e racizmit, pesha e gjuhës së përdorur, si dhe punuan në grupe me shembuj të raportimit nga mediet qendrore e lokale, kështu duke i praktikuar njohuritë e fituara në trajnim.

Gazetarët dhe studentët e gazetarisë nga universitetet private dhe atij publik, në fund të trajnimit u certifikuan për pjesëmarrje nga Terre des hommes – Kosovo dhe Asociacioni i Gazetarëve të Kosovës.

Ky trajnim u organizua si pjesë e projektit “Drejtësia Sociale për Romët, Ashkalitë dhe Egjiptianët”, financuar nga Agjencia Zvicerane për Zhvillim dhe Bashkëpunim (SDC), implementuar nga organizatat partnere Terre des hommes, Zëri i Romëve, Ashkalinjve dhe Egjiptianëve dhe HEKS/EPER.

U mbajt ceremonia e certifikimit të 15 gazetarëve pjesëmarrës në “Akademinë në fushën e raportimit për Ballafaqimin me të Kaluarën (BmK), dhe Raportimin e Sensibilizuar për Konflikt”.

Përtej ndarjes së certifikatave, gjatë kësaj ceremonie u mbajt edhe një panel diskutimi, i moderuar nga Getoarbë Mulliqi – Drejtore Ekzekutive e AGK-së, dhe i përbërë nga Vjollca Hajrullahu Islami – Menaxhere e projekteve tek forumZFD, Besian Beha – gazetar, dhe Feride Zeynullah – gazetare.

Gjatë këtij paneli u diskutua për rëndësinë e trajnimeve në fushën e raportimit për Ballafaqimin me të Kaluarën (BmK), dhe Raportimin e Sensibilizuar për Konflikt, si dhe rolin e medias dhe gazetarisë ne këto fusha. Gjithashtu, u diskutua se si gazetarët mund të kontribuojnë në një diskurs publik më të informuar, empatik dhe të orientuar drejt paqes.

Gjatë ngjarjes së certifikimit u nënshkruan edhe Memorandumet e Mirëkuptimit me mediet lokale, përmes të cilave gazetarët pjesëmarrës të akademisë patën mundësi që të prodhojnë artikuj në fushën për ballafaqimin me të kaluarën.

Akademia në fushën e raportimit për Ballafaqimin me të Kaluarën (BmK), dhe Raportimin e Sensibilizuar për Konflikt filloi në mars të këtij viti në bashkëpunim me forumZFD- Programi në Kosovë, ku u ofruan një sëre trajnimesh lidhur raportimin për ballafaqimin me të kaluarën, raportimin e sensibilizuar për konflikt, lajmet e rrejshme në ballafaqimin me të kaluarën dhe roli i medias në procesin e pajtimit.

Synimi i të gjitha këtyre trajnimeve ishte pajisja e pjesëmarrësve me aftësitë dhe njohuritë e nevojshme për të naviguar në mënyrë efektive në raportimin mbi gazetarinë e sensibilizuar për konflikte dhe trajtimin e ndjeshëm të ngjarjeve të së kaluarës.

Asociacioni i Gazetarëve të Kosovës në koordinimin e Terre des hommes – Kosovo, e ka nisur serinë e trajnimeve për antigjipsizmin në Kosovë – raportimi i përgjegjshëm dhe etik për komunitetet rom, ashkali dhe egjiptian, për këtë vit.

Trembëdhjetë gazetarë e studentë të gazetarisë, nën mentorimin e trajnerit, Lendrit Qeli, këtë fundjavë ndjekën trajnimin e organizuar nga AGK-ja dhe Terre des hommes – Kosovo.

Pjesëmarrësit, fillimisht u njoftuan me kontekstin historik e social të komuniteteve rom, ashkali dhe egjiptian në Kosovë, të kuptuarit e antigjipsizmit, mediet sociale dhe rrjedhjen e racizmit, pesha e gjuhës së përdorur e të tjera.

Gjatë trajnimit, gazetarët punuan në grupe me shembuj konkret të raportimeve nga mediet qendrore në vend, duke praktikuar kështu njohuritë e fituara gjatë trajnimit.

Ky trajnim u organizua si pjesë e projektit “Drejtësia Sociale për Romët, Ashkalitë dhe Egjiptianët”, financuar nga Agjencia Zvicerane për Zhvillim dhe Bashkëpunim (SDC), implementuar nga organizatat partnere Terre des hommes, Zëri i Romëve, Ashkalinjve dhe Egjiptianëve dhe HEKS/EPER.

Deputeti i Lëvizjes Vetëvendosje, Dimal Basha ka vazhduar edhe këtë fundjavë me gjuhën nxitëse si ndaj AGK-së, ashtu edhe ndaj RTK-së.

Në reagimin e ri pas intimidimit që bëri ndaj gazetares së RTK-së, Basha, e tregon hapur tendencën për të kontrolluar përmbajtjen editoriale të Transmetuesit Publik, duke ndërhyrë në atë se çka konsiderohet prioritet për t’u trajtuar dhe për t’u raportuar. Ngjashëm vepron edhe me AGK-në, kur provon të tregojë se çfarë duhet të bëjë dhe si duhet të sillet e të veprojë.

AGK-ja, e ka për mision primar mbrojtjen e të drejtave dhe lirive të gazetarëve, dhe reagon kur këto të drejta e liri, cenohen e shkelen. Teksa, lidhur me shkeljet e mundshme të Kodit të Etikës, çdo qytetar i Republikës së Kosovës, duke përfshirë deputetët, mund t‘i drejtojnë ato tek organi vetërregullues KMShK për mediet online, dhe tek KPM për televizione dhe radio.

AGK-ja, e fton sërish z.Basha që të përmbahet nga seria e sulmeve, si ndaj AGK-së, ashtu edhe ndaj medieve, duke e përfshirë Transmetuesin Publik, RTK.

Aludimi i serishëm i z. Basha se si AGK ashtu edhe RTK u shërbejnë interesave të presidentit serb, Aleksandar Vuciq, është krejtësisht i pabazuar e i papranueshëm, por mbi të gjitha shumë i rrezikshëm. Gjuha e tillë, e vazhdueshme sikur kjo e z.Basha dhe eksponentëve të tjerë të partisë në pushtet, kanë kontribuar që Kosova të bie kaq shumë në nivelin e respektimit të lirisë së medies, sikurse e ka konstatuar raporti i fundit i Reporterëve pa Kufij.

Në ditën kur raporti i Reporterëve Pa Kufij, e ka nxjerrë Kosovën në pozicionin më të keq në një dekadë sa i përket lirisë së medies, partia politike në pushtet, Lëvizja Vetëvendosje i ka dëshmuar në praktikë gjetjet shqetësuese të këtij raporti.

Deputeti Dimal Basha e ka krahasuar Transmetuesin Publik, RTK me televizionin shtetëror serb, RTS kur është pyetur nga gazetarja Blerta Foniqi Kabashi për kushtin e Asociacionit për anëtarësim e Kosovës, në Këshillin e Evropës.

“Për besë unë e shoh qysh e shoh secili shqiptar. Në RTS-in e Serbisë ata mujnë me pas shqetësim kryesor Asociacionin . Në RTK-në e Kosovës nuk duhet me kane veç Asociacioni…A ta shpjegova që ka marrëveshje Kosova? Pse po e bën temë a duhet me ba Asociacionin a jo? Na e dimë çka është tema kryesore”, ka thënë Basha.

AGK-ja, e përgëzon kolegen Foniqi Kabashi për profesionalizimin e treguar në intervistën me deputetin Basha përkundër sjellës së papërshtatshme të deputetit.

Basha në këtë intervistë e ka sulmuar edhe Asociacionin e Gazetarëve të Kosovës për punën që e bën në mbrojtje të gazetarëve dhe medieve.