Bordi i Asociacionit të Gazetarëve të Kosovës, e ka parë me shqetësim statusin e ish-deputetit të NISMAs, Zafir Berisha kundër autorit të emisionit “Debat Plus” në RTV Dukagjin, Ermal Panduri.

Berisha në profilin e tij në Facebook, ka shkruar se “Ermal Panduri i Dukagjinit vazhdon të mbetet zëri më besnik i politikës së Serbisë, se si i trajton temat që lidhen me luftën dhe me mostrumin politik në Hagë.”

Çdo asocim i gazetarëve dhe medieve me Serbinë është i papranueshëm dhe tejet i rrezikshëm, sidomos për një proces të ndjeshëm siç është ai i Hagës.

AGK-ja, u bënë thirrje politikanëve që të përmbahen nga gjuha e tillë kundër gazetarëve, sepse si pasojë e saj, gazetarët shpesh bëhen cak i kërcënimeve dhe fyerjeve nga opinioni.

Zv. Ambasadori i Holandës në Kosovë, Ronald Goldberg, shtroi darkë/iftar për gazetarët ukrainas dhe afganë që janë strehuar në Kosovë.

Kolegët gjatë këtij takimi ndanë përvojat e tyre të ikjes së detyrusheme nga Ukraina dhe Afghanistani, u njoftuan nga afër me z.Goldberg, si dhe punën e Ambasadës së Holandës në Kosovë.

Gazetarët në këtë takim u shoqëruan nga Kryetari i Bordit të AGK-së, Xhemajl Rexha, dhe Zyrtarja për Komunikim, Rabije Hyseni.

Kolegët ukrainas dhe afganë janë strehuar në Kosovë në kuadër të programit Journalists in Residence – Kosovo, që është iniciuar nga European Centre for Press and Media Freedom ECPMF, mbështetet financiarisht nga Qeveria e Republikës së Kosovës dhe iniciativa Hannah Arendt, si dhe implementohet nga Asociacioni i Gazetarëve të Kosovës.

Jo për herë të parë, Blerim Vela – Shef i Stafit të Presidentes së Kosovë, Vjosa Osmani, ka sulmuar mediet e Kosovës, pas raportimeve për një vendim të pritshëm të Gjykatës Kushtetuese për deputetë të minoriteteve në Kuvendin e Kosovës, që si zinxhir mund të vë në pikëpyetje zgjedhjen e Presidentes.

Vela në një postim skandaloz në Twitter, thotë se raportimet e medieve të Kosovës “janë pjesë e luftës speciale të realizuar sipas skemës së përgatitur nga Beogradi dhe të realizuar përmes kriminelëve të veriut dhe sekserëve të tyre, të cilët ndodhën në listën e zezë të SHBA-së”.

Kjo është një gjuhë e papranueshme dhe shumë e rrezikshme që rëndon ambientin e punës së gazetarëve në Kosovë. Për më tepër është vazhdimësi e sulmeve të zotit Vela ndaj medieve.

Teksa merr pjesë në Samitin e Demokracisë, AGK-ja i bën thirrje të përsëritur presidentes Vjosa Osmani që përfundimisht të ndalojë sulmet ndaj medieve nga kabineti i saj, e që shërbejnë si presion direkt në punën e tyre.

Gazetarët afganë të strehuar në Kosovë, që nga e hëna do të fillojnë të punojnë në hapësirat e Radio Kosovës. Përveç hapësirave, ata kanë në dispozicion për përdorim edhe mjetet e punës në këtë objekt.

Gjatë ditës së sotme, në shoqërimin e Kryetarit të Bordit të AGK-së, Xhemajl Rexha, dhe Zyrtares Ligjore të ECPMF-së, Flutura Kusari, kolegët afganë u mirëpritën nga Drejtorja e Radios, Flora Durmishi, si dhe kolegët gazetarë me të cilët do të punojnë.

Për ofrimin e shfrytëzimit të hapësirave të transmetuesit publik, ishte zotuar Drejtori Gjeneral, Shkumbin Ahmetxhekaj, qysh në prill të vitit të kaluar, kur në Kosovë ishte strehuar edhe gazetarja e parë ukrainase.

AGK-ja dhe ECPMF-ja, falënderojnë gatishmërinë e udhëheqësisë së RTK-së, që t’u ndihmojë kolegëve afganë që të vazhdojnë të ushtrojnë profesionin e tyre.

Me rastin e fillimit të muajit të agjërimit, Ramazanit, ish-Presidentja e Republikës së Kosovës, Atifete Jahjaga, iftarin e parë të këtij muaji e shtroi për gazetarët afganë të strehuar në Kosovë.

Gjatë këtij iftari, kolegët afganë patën rastin të njihen nga afër me Presidenten Jahjaga, teksa i treguan përvojat e tyre të ikjes nga Afganistani pas marrjes nën kontroll nga Talebanët, si dhe disa nga traditat e tyre në pritjen e këtij muaji.

Teksa, Jahjaha njoftoi gazetarët për Fondacionin që e drejton, si dhe punën që bënë për fuqizimin e grave në Kosovë.

Gazetarët afganë shoqëroheshin nga Kryetari i Bordit të AGK-së, Xhemajl Rexha dhe Drejtorja Ekzekutive, Getoarbë Mulliqi Bojaj.

Mbrëmë, në nder të shënimit të 100 vjetorit të themelimit të BBC-së, gazetarët ukrainas dhe afganë të strehuar në Kosovë, morën pjesë në një koktej të organizuar nga Ambasada e Britanisë së Madhe në Kosovë.

Kolegët ukrainas dhe afganë patën rastin të takojnë për së afërmi Ambasadorin Nicholas Abbott, si dhe të shkëmbejnë përvojat e tyre me redaktorë e gazetarë të njohur në Kosovë.

Përgjatë këtij eventi, gazetarja e parë ukrainase e strehuar në Kosovë, Lyudmila Makey, ia dhuroi një pikturë Ambasadorit Abbott, të pikturuar nga vetë ajo, e që simbolizonte paqen dhe dashurinë.

Në këtë event, kolegët nga Ukraina dhe Afganistani u shoqëruan nga Drejtorja Ekzekutive e AGK-së, Getoarbë Mulliqi Bojaj dhe Zyrtarja Ligjore e ECPMF-së, Flutura Kusari.