Asociacioni i Gazetarëve të Kosovës është njoftuar sot nga redaksia e portalit online “Nacionale”, se po përballen me një seri sulmesh kibernetike, që ndikojnë direkt në punën e gazetarëve të kësaj medie.

AGK-ja kërkon nga Policia e Kosovës, dhe Njësiti për Krime Kibernetike që të hetojnë urgjentisht burimin e këtyre sulmeve dhe gjetjen e autorëve të këtij organizimi.

Mediet kosovare kanë qenë cak i sulmeve kibernetike edhe në të kaluarën, dhe kjo ndikon përvec financiarisht edhe në lirinë e medias për të vepruar si dhe sigurinë e informacioni. Prandaj, AGK-ja fton institucionet e sigurisë së Kosovës që ta trajtojnë fenomenin me prioritet.

Mesditën e sotme në Kosovë, kanë mbërritur gazetaret e radhës ukrainase, Maryna Zhyvotkova dhe Viktoriia Kaidash – si pjesë e programit “Journalists in Residence – Kosovo”.

Gazetaret janë mirëpritur në aeroport nga zyrtarja ligjore e ECPMF, Flutura Kusari, Drejtorja Ekzekutive e AGK-së, Getoarbë Mulliqi Boja, përfaqësues të MPB-së dhe Policisë së Kosovës.

Deri më tani si pjesë e programit “Journalists in Residence – Kosovo” që financohet nga Qeveria e Republikës së Kosovës, janë strehuar katër kolegë ukrainas.

Në kuadër të këtij programi, gazetarët që janë detyruar të ikin nga Ukraina përfitojnë pagë mujore, pagesën e qerasë dhe sigurim shëndetësor.

ECPMF dhe AGK janë duke bërë përgatitje që në ditët në vijim të presë gazetarë të tjerë nga Ukraina.

Asociacioni i Gazetarëve të Kosovës, me mbështetjen e projektit të përbashkët të Këshillit të Evropës dhe Bashkimit Evropian “Liria e Shprehjes dhe Liria e Medias (JUFREX)”, organizoi punëtori dyditore me gazetarë shqiptarë dhe serbë “Sfidat e dygjuhësisë”.

Në punëtorinë e udhëhequr nga Nenad Sebek – Konsulent Ndërkombëtar për Media dhe Shoqëri Civile, Slaviša Mladenović dhe Ivana Pavlović nga Zyra e Komisionerit për Gjuhët, gazetarët pjesëmarrës diskutuan për ligjin mbi përdorimin e gjuhëve zyrtare dhe pengesat e gazetarëve në raport me zbatimin e tij, rregulloret dhe praktikat komunale në Kosovë për njohjen dhe përdorimin e gjuhëve, si dhe përkthimet e dokumenteve zyrtare dhe përmbajtjeve online në uebfaqet e institucioneve publike.

Gazetarët gjithashtu u informuan më detajisht për të drejtat e tyre për të pasur qasje në informata në të dyja gjuhët zyrtare, procedurat e ankimit në rastet e vonesave ose mungesës së informatave, rolin e tyre në sigurimin e dygjuhësisë, si dhe për përvojat ndërkombëtare se si raportimi kontribuon në zgjidhje në këtë fushë.

AGK-ja së shpejti do të publikojë rekomandimet e nxjerra nga kjo punëtori.

Asociacioni i Gazetarëve të Kosovës – AGK, me mbështetjen e Institutit Kombëtar Demokratik – NDI dhe USAID në Kosovë, sot ka mbajtur konferencën “Ndikimet nga jashtë në mediat në Kosovë; Çfarë nxorri në pah lufta në Ukrainë?”.

Fjalët hyrëse të konferencës u prezantuan nga Kryetari i Bordit të AGK-së, Xhemajl Rexha dhe Ambasadorja Nancy Soderberg – Drejtore e Lartë Rezidente e NDI në Kosovë.

Në pjesën e parë të konferencës, paneli i përbërë nga Ardita Zejnullahu – Drejtore Ekzekutive e Asociacionit të Mediave të Pavarura të Kosovës, Besnik Berisha – Anëtar i Bordit të Komisionit të Pavarur të Mediave, Nazim Rahimi – Kryetar i Bordit të ARKEP-it dhe Shpend Lutfiu – Zyrtar i Lartë për Siguri Kibernetike në po të njëjtën organizatë, diskutuan për mekanizmat parandalues për shpërndarjen e propagandës.

Panelistët së bashku me pjesëmarrësit e Akademisë së Gazetarëve për Integritetin e Informacionit, diskutuan për propagandën nga jashtë dhe lajmet e rreme në Kosovë, legjislacionin në fuqi për mbylljen e ueb faqeve si dhe sigurinë kibernetike.

Teksa, ndërtimi i rezistencës së mediave ndaj dezinformatave nga jashtë u diskutua në pjesën e dytë të konferencës së bashku me Visar Prebrezën nga BIRN dhe Lyudmila Makey – Gazetare nga Ukraina.

Në këtë pjesë u diskutua për mënyrat e verifikimit dhe filtrimit të informacioneve para se të publikohen ato, identifikimi i informacioneve që dalin nga burime që mund të kenë ndikim negativ në mjedisin medial në Kosovë, si dhe luftën e vet mediave në këtë drejtim.

Gjithashtu, në fund të konferencës u bë certifikimi i pjesëmarrësve të Akademisë së Gazetarëve për Integritetin e Informacionit. Akademi kjo që filloi në nëntor të vitit 2021 dhe përmes së cilës u ofruan një seri e trajnimeve dhe diskutimeve lidhur me integritetin e informacionit, profesionalizmin në gazetari dhe prezencën e dezinformimit, etikën gjatë raportimit me fokus të veçantë në portretizimin e grave në media dhe perspektivën ligjore të gazetarisë dhe mediave.

Kryetari i Bordit të AGK-së, Xhemajl Rexha, së bashku me gazetarë nga Ukraina Lyudmila Makey, Liudmyla Mekh, Serhii Shevchenko dhe Daria Meshchriakova, pritën në takim ambasadoren Nancy Soderberg – Drejtore e NDI në Kosovë.

Ambasadorja Soderberg u njoftua nga afër me kolegët ukrainas, përvojat e tyre personale e të raportuarit nga zonat e konflikteve, sfidat që kanë hasur përgjatë këtij rrugëtimi, njëherësh diskutuan edhe mundësitë për bashkëpunim.

Në takim prezent ishin edhe Drejtoresha Ekzekutive e AGK-së, Getoarbë Mulliqi Bojaj, Adea Beqaj – Zyrtare e Programit në NDI dhe Pajtim Gashi – Menaxher i Programit në NDI.

Të hënën pasdite ka mbërritur në Kosovë gazetarja, Daria Meshchriakova, e katërta gazetare që sistemohet në kuadër të projektit “Gazetarët në Rezidencë – Kosovë”.

Zonja Meshchriakova është e specializuar për raportim në fushën e sportit, dhe është njohëse e mirë e zhvillimeve në Kosovë dhe rajon.

Në programin e mbështetur financiarisht nga Qeveria e Kosovës, gazetarët që janë detyruar të ikin nga Ukraina përfitojnë pagë mujore, pagesën e qerasë dhe sigurim shëndetësor.

Meshchriakova është pritur në aeroport nga kryetari i AGK-së, Xhemajl Rexha dhe përfaqësuesja ligjore e ECPMF, Flutura Kusari, organizata këto implementuese të projektit.