Më 10 janar, Komisioni Evropian nisi një konsultim të hapur publik mbi Aktin e ardhshëm Evropian për Lirinë e Medias, një iniciativë e rëndësishme e shpallur nga presidentja von der Leyen në fjalimin e saj mbi situatën në Bashkimin në vitin 2021 për të mbrojtur pluralizmin dhe pavarësinë e medias në BE. Kjo pasoi një thirrje për prova të publikuar më 21 dhjetor 2021 që përshkruan objektivat kryesore të nismës, opsionet e mundshme dhe ndikimet.

Nënkryetarja e KE për vlerat dhe transparencën, Věra Jourová, tha: “Media është një shtyllë e demokracisë. Por sot kjo shtyllë po thyhet, me përpjekjet e qeverive dhe grupeve private për të ushtruar presion mbi mediat. Prandaj, Komisioni do të propozojë rregulla dhe masa mbrojtëse të përbashkëta për të mbrojtur pavarësinë dhe pluralizmin e medias. Gazetarët duhet të jenë në gjendje të bëjnë punën e tyre, të informojnë qytetarët dhe t’i mbajnë ata përgjegjës pa frikë apo favorizime. Tani kemi hapur një konsultim të gjerë për të dalë me propozimin më të mirë.”

Komisioneri për Tregun e Brendshëm, Thierry Breton shtoi: “Ne duhet të sigurohemi që mediat evropiane të mbeten të pavarura, inovative dhe të qëndrueshme dhe të funksionojnë pa asnjë ndërhyrje të pajustifikuar në aktivitetet e tyre, qofshin ato private apo publike. Sot ne nisim konsultimin tonë mbi Aktin e ardhshëm të Lirisë së Medias: duam të dëgjojmë pikëpamjet tuaja dhe të eksplorojmë zgjidhjet tuaja për një treg mediatik elastik, i cili u jep qytetarëve informacion të larmishëm dhe të besueshëm.

Konsultimi synon të mbledhë pikëpamjet mbi çështjet më të rëndësishme që ndikojnë në funksionimin e tregut të brendshëm mediatik, duke përfshirë llojet e ndryshme të ndërhyrjeve në media, si dhe tendencat ekonomike. Ai mbulon tre fusha kryesore që kanë të bëjnë me tregjet mediatike, e para fokusohet në transparencë dhe pavarësi (p.sh. shqyrtimi i transaksioneve të tregut mediatik, transparenca e pronësisë së medias dhe matja e audiencës), e dyta në kushtet për funksionimin e tyre të shëndetshëm (p.sh. ekspozimi i publikut ndaj një pluralitet pikëpamjesh, inovacioni mediatik në tregun e BE-së) dhe i treti për shpërndarjen e drejtë të burimeve shtetërore (p.sh. pavarësia e mediave të shërbimit publik, transparenca dhe shpërndarja e drejtë e reklamave shtetërore). Priten gjithashtu reagime mbi opsionet mbështetëse të qeverisjes për Aktin që mund të bazohet në ‘Grupin e Rregullatorëve Evropianë për Shërbimet Mediatike Audiovizuale (ERGA).

SFONDI

Akti Evropian për Lirinë e Medias është planifikuar të miratohet në tremujorin e tretë të vitit 2022, siç thuhet në Programin e Punës të Komisionit 2022. Ai do të bazohet në Direktivën e rishikuar të Shërbimeve Mediatike Audiovizive, e cila përcakton rregullat për pavarësinë e rregullatorëve të medias, promovon transparencën e pronësisë së medias dhe pranon se vendimet editoriale duhet të jenë pa ndërhyrje. Nisma do të fokusohet në eliminimin e barrierave për krijimin dhe funksionimin e shërbimeve mediatike dhe do të synojë krijimin e një kuadri të përbashkët për avancimin e tregut të brendshëm në sektorin e medias, në funksion të mbrojtjes së lirisë së medias dhe pluralizmit në atë treg. Ai do të jetë koherent me përpjekjet e BE-së në promovimin e pjesëmarrjes demokratike, luftimin e dezinformimit dhe mbështetjen e lirisë dhe pluralizmit të medias, siç përcaktohet në Planin e Veprimit për Demokracinë Evropiane. Në veçanti, ai do të plotësojë Rekomandimin e miratuar së fundmi për mbrojtjen, sigurinë dhe fuqizimin e gazetarëve, paketën e propozuar të Ligjit për Shërbimet Dixhitale dhe nismën e ardhshme për të mbrojtur gazetarët dhe mbrojtësit e të drejtave nga proceset gjyqësore abuzive (SLAPP). Akti Evropian për Lirinë e Medias do të shkojë gjithashtu paralelisht me veprimet që lidhen me qëndrueshmërinë, qëndrueshmërinë dhe transformimin dixhital të sektorit të medias, të kryera në kuadër të Planit të Veprimit për Media dhe Audiovizuale.

Asociacioni i Gazetarëve të Kosovës – AGK, me mbështetjen e Misionit të OSBE-së në Kosovë, sot ka ndarë Çmimet Vjetore për Gazetari 2021.

Juria profesionale e përbërë nga Elida Ramadani, Bahri Cani, Gjeraqina Tuhina, Annamari Repiq dhe Sylejman Kllokoqi, ka vlerësuar 55 aplikimet që ka pranuar AGK-ja.

Në kategorinë “Gazetari i Vitit”, u shpërblye gazetari Kastriot Berisha nga KALLXO.com, çmim ky që iu nda nga Ambasadori Michael Davenport – Shefi i Misionit të OSBE-së në Kosovë.

Çmimi për “TV Storjen më të mirë të vitit”, iu dha gazetares nga Radio Televizioni i Kosovës, Valdete Osmani. Çmimi u nda nga anëtarja e Bordit të AGK-së, Naile Dema Selmani.

Teksa, në kategorinë “Web storja më e mirë e vitit”, u shpërblye gazetari i Radio Evropës së Lirë, Arton Konushevci, me storjen “Qindra placenta kutërbojnë në Gjinekologji”. Çmimi u nda nga Drejtorja Ekzekutive e AGK-së, Getoarbë Mulliqi Bojaj.

Ndërsa, në kategorinë “Kameramani më i mirë i vitit”, u shpërblye kameramani Deniz Sllovinja nga KALLXO.com. Çmimi u nda nga kameramani Sylejman Kllokoqi.

Asociacioni i Gazetarëve të Kosovës – AGK, në këtë ceremoni gjithashtu nderoi me mirënjohje për kontributin e çmueshëm shumëvjeçar në gazetarinë e vendit kolegët tanë gazetarë dhe kameramanë që kanë ndërruar jetë përgjatë vitit 2020 dhe 2021.

Çmimet Vjetore për Gazetari 2021 u rikthyen pas gjashtë vitesh me mbështetjen Misionit të OSBE-së në Kosovë, dhe me anë të këtyre çmimeve synojmë që çdo vit të nderohen gazetarët për punën që bëjnë.

Asociacioni i Gazetarëve të Kosovës e ka pranuar me shqetësim raportimin e gazetarit kosovar, Adriatik Kelmendi, për marrjen në pyetje nga ana e BIA-s serbe në vizitën e tij të fundit në Beograd.

Sipas Kelmendit, në fakt, ai është përballur me një sjellje të tillë të autoriteteve serbe secilën herë që i ka rënë të udhëtojë në Serbi, tash e një kohë. Kelmendit i janë kërkuar sqarime për pozicionet e tij publike.

AGK-ja e konsideron të papranueshme një sjellje të tillë ndaj një gazetari dhe aktivisti për pajtim rajonal.

Asociacioni i Gazetarëve të Kosovës e fton Bashkimin Evropian që të reagojë për këtë sjellje që e minon mendimin e lirë dhe procesin e pajtimit në rajon.

Gazetari i portalit online, Paparaci.com, Vehbi Kajtazi, ka njoftuar Asociacionin e Gazetarëve të Kosovës- AGK, për një numër të madh kërcënimesh, mbi 100, që ka marrë pas deklaratave të tij në RTV Dukagjini rreth Grupit të Kumanovës.

“Prej asaj dite kam marrë qindra kërcënime me jetë nga persona të ndryshëm. Këto kërcënime janë nxitur edhe nga reagimet e grupit të dënuar të cilët lirshëm shkruajnë e lidhen me Televizione. Sot, zyrtarisht kam hapur rast në Polici kundër një numri prej 100 personash kërcënimet e të cilëve janë shumë serioze. Me rastin tashmë janë duke u marrë Krimet e Rënda në Polici, sektor ky që po merret me verifikimin dhe hetimin e këtyre rasteve. Numri i rastit të hapur në Polici është 2021 – AB 3245”, ka shkruar Kajtazi në letrën për AGK-në.

AGK-ja dënon fuqishëm kërcënimet me jetë ndaj Kajtazit dhe e fton Policinë e Kosovës që të ofrojë siguri për të dhe personat e afërt të tij, si dhe të trajtojë me prioritet rastin e paraqitur nga ai.

Asociacioni i Gazetarëve të Kosovës – AGK, e ka pranuar me shqetësim vazhdimin e gjuhës linçuese të grupit #mekryeministrin, në Facebook.

Ky grup, i cili është hapur dhe funksionon në shërbim të partisë në pushtet dhe kryeministrit, Albin Kurti, vazhdimisht ka sulmuar gazetarë të medieve të ndryshme të Kosovës. Edhe pas rihapjes, grupi ka sulmuar një pjesë të medias duke i quajtur ato të Klanit Pronto.

Përkrahja publike e deputetes së Vetëvendosje, Fitore Pacolli, ndaj këtij dhe kësaj gjuhe të përdorur, i vë seriozisht në rrezik gazetarët, andaj është e dënueshme dhe e prapranueshme për AGK-në.

Ftojmë Qeverinë e Republikës së Kosovës dhe Lëvizjen Vetëvendosje, të distancohen nga kjo gjuhë linçuese dhe të ndalojnë përkrahjen, qoftë indirekte për sulmet e tilla ndaj gazetarëve.

Asociacioni i Gazetarëve të Kosovës -AGK, me mbështetjen e Institutit Kombëtar Demokratik – NDI dhe USAID në Kosovë, po mban sot modulin e parë të Akademisë së Gazetarëve për Integritetin e Informacionit.

Në hapjen e kësaj akademie, studentëve të gazetarisë dhe gazetarëve të medieve qendrore e lokale, iu adresuan Xhemajl Rexha – Kryetar i Bordit të AGK-së, Ambasadorja Nancy Soderberg – Drejtore e lartë rezidente e NDI në Kosovë dhe James Evans Butler – Zëvendësdrejtor i zyrës për Qeverisje dhe Demokraci në USAID Kosovë.

Rexha, në emër të AGK-së, falënderoi NDI-në dhe USAID-in si partnerë shumë të rëndësishëm të organizatës për mundësimin e Akademisë, duke shpresuar që përmes këtyre moduleve do të shkëmbehen praktikat më të mira për integritetin e informacionit.

“Në këtë kohë posaçërisht sfiduese për integritetin e informacionit, besoj se do të jeni në gjendje të mësoni praktikat më të mira për verifikimin e informacionit. Ju nxis që mësimet nga Akademia t’i ndani edhe me kolegët në redaksitë tuaja dhe që kjo të shërbejë edhe për edukimin e publikut.”

Ambasadorja Soderberg , theksoi rëndësinë e medieve të pavarura dhe të lira për funksionimin e mirëfilltë të demokracisë.

“Që të parandalojmë dhe luftojmë në mënyrë efektive kampanjat dezinformuese është e rëndësishme që të promovohet gazetaria profesionale, si dhe të pajisen gazetarët me njohuritë dhe praktikat më të mira për luftimin e dezinformimit”.

Teksa, James Evans Butler nga USAID, vuri në dukje nevojën për ngritjen e kapaciteteve verifikuese, forcimin e integritetit të zgjedhjeve dhe portretizimin e duhur të grave në media.

“Edukimi dhe trajnimi i gazetarëve të së nesërmes është qenësor për ruajtjen e integritetit të informacionit”, pohoi ai.

Në modulin e parë të akademisë, pjesëmarrësit së bashku me Dren Gërgurin – Ligjërues në Departamentin e Gazetarisë në Universitetin e Prishtinës, po diskutojnë për verifikimin e fakteve dhe vlerësimin e informacionit.

Akademia e Gazetarëve për Integritetin e Informacionit do të vazhdojë edhe me pesë module të tjera.

Redaksia e gazetës Bota Sot e ka njoftuar AGK-në për një telefonatë që kryeredaktori i saj thotë se e ka pranuar të dielën mbrëma.

Sipas kësaj gazete online, Idriz Morina, ka pranuar një telefonatë me mesazhe kërcënuese për të dhe familjen për shkak të shkrimeve të tij. Morina e ka paraqitur rastin në Polici, dhe është hapur procedura me vlerësimin “kanosje”, sipas procedurës hetimore.

AGK-ja e dënon këtë rast, dhe kërkon nga Policia e Kosovës që ta trajtojë me prioritet.