PRISHTINË, 03.10.2017 – Kryetari i Asociacionit të Gazetarëve të Kosovës, Shkelqim Hysenaj dhe drejtori ekzekutiv,  Arben Salihu pritën në takim përfaqësuesit e Zyrës për Komunikim Publik në kuadër të Zyrës së Kryeministrit, Violeta Hyseni – Kelmendi si dhe Ismet Cakiqi.

Gjatë takimit AGK u njoftua për draft / koncept dokumentin për shërbimin e komunikimit qeveritar. Përfaqësuesit e Zyrës së Kryeministrit njoftuan se dokumenti përfshin analizën e komunikimit qeveritar dhe ofron rekomandime për përmirësimin e komunikimit me media dhe publikun.

AGK do të analizojë draft dokumentin si dhe do ta përcjell këtë iniciativë për shkak të interesit tonë të natyrshëm për rritjen e transparencës dhe përmirësimin e komunikimit të institucioneve me media/gazetarë.

PRISHTINË, 14.09.2017 – Kryeredaktori i gazetës “Insajderi” Vehbi Kajtazi ka njoftuar Asociacionin e Gazetarëve të Kosovës se ka pranuar një kërcënim me jetën. Kajtazi ka thënë se është kërcënuar nga deputeti Bekë Berisha i cili sipas gazetarit, ka shkuar në rëstorantin e një miku të tij duke ja lënë këtë porosi: “Tregoi atij shokut tënd se nëse edhe një herë ma përmend emrin në gazetë, të pret plumbi në ballë”.

Bordi i AGK-së është jashtëzakonisht i shqetësuar me këtë kërcënim dhe kërkon nisje të shpejt të hetimeve nga institucionet e drejtësisë.

PRISHTINË, 13/09/2017 – Asociacioni i Gazetarëve të Kosovës është i dëshpëruar me deklaratat e kryeministrit të vendit Ramush Haradinaj i cili ironizoi me përgatitjen profesionale të gazetarëve. AGK e konsideron të papranueshëm veprimin e kryeminsitrit ndëkohë që deklaratat e bëra nga ai paraqesin ofendim ndaj gazetarëve në vend.
Duke përcjellur me shqetësim këtë deklarim të kryemnistrit të ri, ne rikujtojmë se misioni i gazetarëve është që të bëjnë pyetje sa herë që ata kanë nevojë për përgjigje ndërkohë që përmbajtjen e pyetje nuk do të mund ta kontrollojë askush.
Me këtë rast, AGK kërkon nga kryemnistri Ramush Haradinaj që të jetë bashkëpunues me gazetarë si dhe të punojë intenzivisht në rritjen e bashkëpunimit me media si dhe transparencës së qeverisë.

PRISHTINË, 11.09.2017 – Asociacioni i Gazetarëve të Kosovës e dënon gjuhën e përdorur nga ish-gazetari, tani deputeti i Kuvendit të Kosovës Milaim Zeka ndaj gazetarëve Parim Olluri dhe Vehbi Kajtazi nga Insajderi.

Gjuha akuzuese e përdorur nga deputeti Milaim Zeka nuk përkon me punën dhe misionin që ka një deputet.

PRISHTINË, 04.09.2017 – Asociacioni i Gazetarëve të Kosovës (AGK) dënon përzgjedhjen e medias nga koalicioni PAN dhe partisë Aleanca Kosova e Re (AKR) me rastin e arritjes së marrëveshjes e cila ka për qëllim që të formojë institucionet pas zgjedhore.

AGK shpreh shqetësimin e thellë  pasi që mediat nuk ishin ftuar të mbulojnë ceremoninë e nënshkrimit të marrëveshjes ndërmjet koalicionit PAN dhe AKR-së së Behgjet Pacollit. Në të vërtetë, Arbresh.info ishte portali i vetëm që mbuloj këtë ngjarje.

“AGK konsideron se në këtë aktivitet do të duhej të ftoheshin të gjitha mediat pa përjashtim,” thuhet në reagimin e asociacionit.

Pronari i portalit është Rrahim Pacolli, i afërm i presidentit të AKR-së, Behgjet Pacolli. Marrëveshja e re do të përfundoj bllokimin e formimit të institucioneve dhe do të mbyll krizën politike pas zgjedhore në Kosovë që nga zgjedhjet e parakohshme parlamentare të mbajtura më 11 qershor 2017.

“Veprimi i sotëm i koalicionit PAN – AKR ka për qëllim ikjen e personaliteteve të caktuara politike nga mediat dhe gazetarët. Poashtu me këtë veprim, koalicioni në fjalë ka pasur për qëllim që diktojë raportimin e mediave për këtë marrëveshje që paraqet interes të jashtëzakonshëm për opinionin publik,” tha AGK.

AGK kërkon angazhim më të madh të subjekteve politike, sidomos atyre që mëtojnë ardhjen në pushtet që të jenë të gatshme të ballafaqohen dhe bashkëpunojnë me gazetarët.

PRISHTINË, 18/07/2017 – Ish-deputeti, Adem Grabovci heq dorë me kërkesë të tij nga largimi i përgjimeve që përfshinin atë dhe kolegët e tij partiak, të cilat u publikuan online gjatë vitit të kaluar.

Avokati i Grabovcit i tha gjykatësit të martën se klienti i tij, Adem Grabovci nuk është duke kërkuar më largimin e përgjimeve telefonike të cilat u publikuan në gazetën onlinë, Insajderi.

Vitin e kaluar, Insajderi publikoi një seri të incizimeve telefonike ndërmjet Adem Grabovcit, ish-shefit të grupit parlamentar të PDK-së, dhe kolegëve të tij të partisë, duke përfshirë presidentin e sotëm Hashim Thaçi dhe kryeparlamentarin Kadri Veseli.

Bisedat e përgjuara tregojnë se si Grabovci dhe kolegët kanë ndikuar në emërime të njerëzve në poste të larta publike.

Pas publikimit, Adem Grabovci ka paditur Insajderin duke kërkuar largimin e përgjimeve por që Gjykata Themelore në Prishtinë ka refuzuar kërkesën e tij.

Në nëntor të vitit 2016, Gjykata e Apelit ka prishur aktvendimin e gjykatës themelore duke urdhëruar shkallën e parë që të kërkoj nga paditësi prova të reja në lidhje me pretendimet e tij.

Sidoqoftë, në gusht 2016, zyra e Prokurorit të Shtetit ka nisur një hetim për dyshimet se Grabovci “ka shfrytëzuar detyrën dhe autoritetin e tij zyrtar për të siguruar fuqi politike dhe ndikim për proceset vendim marrëse përbrenda institucioneve, agjencive qeveritare dhe ndërmarrjet publike”.