PRISHTINË, 23/06/2017 – Asociacioni i Gazetarëve të Kosovës ka kënaqësinë të ju informojë që si rezultat i angazhimit të vazhdueshëm, gazetarët do ta kenë më të lehtë marrjen e informacioneve nga autoritetet publike për financimin publik të organizatave joqeveritare.

Kjo është mundësuar pasi që Ministria e Financave e ka marrë parasysh shumicën e komenteve të AGK-së të dërguara gjatë procesit të konsultimit publik për Rregulloren MF-NR-04/2017 mbi Kriteret, Standardet dhe Procedurat e Financimit Publik të OJQ-ve.

AGK ka kërkuar që institucionet përgjegjëse të obligohen me rregullore që të bëjnë publike emrat e anëtarëve të komisioneve që bëjnë vlerësimin e aplikacioneve dhe planet, rregullat, rezultatet dhe raportet për dhënien e fondeve publike në sektorin joqeveritar.

Analiza ligjore dhe komentet janë përgatitur nga AGK në bashkëpunim me juristën e së drejtës së medias Flutura Kusari.

AGK do të vazhdojë të monitorojë legjislacionin dhe të ofrojë kontribut sa herë që kemi të bëjmë me lirinë e medias si dhe transparencë.

Me respekt,

Asociacioni i Gazetarëve të Kosovës

PRISHTINË, 03.05.2017 – Asociacioni i Gazetarëve të Kosovës së bashku me Këshillin për Mediat e Shkruara të Kosovës dhe të përkrahur nga organizata të shoqërisë civile organizuan një aksion protestues në Ditën Botërore të Lirisë së Shtypit para objektit kryesor të qeverisë në sheshin ”Skënderbeu” në Prishtinë.

#Folmosutut është motoja e aksionit e që për qëllim ka kundërshtimin e tendencave për të kufizuar lirinë e mediave dhe shprehjes në përgjithësi, sidomos përmes iniciativës së fundit të Ministrisë së Drejtësisë për ndryshimin e Kodit Penal të Republikës së Kosovës.

Në këtë protest po ashtu është ngritur zëri kundër mosndëshkueshmërisë nga sistemi i drejtësisë ndaj rasteve të sulmeve fizike dhe kërcënimeve me jetë ndaj gazetarëve dhe profesionistëve tjerë medial.

Komuniteti i gazetarëve po ashtu ka protestuar kundër censurës, për kushte më të mira të punës dhe për qasje me kohë në informacione nga institucionet publike.

Që nga Janari deri në fund të Prillit 2017, AGK ka evidentuar shtatë raste të kërcënimeve verbale ndaj gazetarëve.

PRISHTINË, 27.04.2017 –

Organizatat e mëposhtme të shoqërisë civile kundërshtojnë fuqishëm draftligjin e hartuar të Ministrisë së Drejtësisë për ndryshimin e Kodit Penal të Republikës së Kosovës. Draftligji i propozuar shkel thellësisht parimet fundamentale të një shteti demokratik ku respektohen liritë dhe të drejtat e njeriut. Qëllimi i Ministrisë së Drejtësisë që të kriminalizojë lirinë e shprehjes përbën një hap drejtë autoritarizimit të Kosovës, dhe në kundërshtim të plotë me rrugën e reformave Evropiane për të cilat Republika e Kosovës duhet të jetë e përkushtuar.

Gazetari Musa Mustafa nga Mitrovica ka informuar Asocicaionin e gazetarëve të Kosovës më 12 prill 2017 se ka pranuar SMS që ka kërcënuar jetën e tij dhe të familjes së tij nëse “vazhdon të shkruaj për Serbët”. Mustafa është pronar i portalit “Infojeta.net” dhe ka theksuar se ka pranuar këtë kërcënim për shkak të raportimeve të tij për strukturat paralele serbe dhe çështje tjera të sigurisë në qytetin e ndarë të Mitrovicës.

Mustafa i ka thënë AGK-së se e ka raportuar rastin edhe në polici në Mitrovicë. AGK ka qenë në kontakt edhe me policinë dhe është informuar për fillimin e hetimeve policore. Megjithatë, pas dy ditësh, policia ka informuar se gazetari ka bërë lajmërim të rrejshëm pasi hetuesit kanë zbuluar se në të vërtetë ai i kishte dërguar vetes atë sms. Policia e Kosovës bazuar në dëshmi ka ngritur kallëzim penal kundër Mustafës për “lajmërim të rremë”. AGK do të monitorojë zhvillimet e mëtejshme në lidhje me këtë rast deri në një vendim përfundimtar.

Ne jemi të angazhuar që të bashkëpunojmë me institucionet e Republikës së Kosovës në zbardhjen edhe të këtyre rasteve si dhe çdo lloj kërcënimi, shantazhi, sulmi apo formave të tjera të presionit që ushtrohen ndaj gazetarëve. Andaj duke u nisur nga kjo, në inkurajojmë të gjitha organanet e drejtësisë që të vazhdojnë punën në zbardhjen e jo vetëm këtij rasti porse edhe të rasteve të tjera.

AGK-ja së fundi ka vendosur ura të rregullta komunikimi me institucionet duke përfshirë Policinë e Kosovës, Prokurorinë e Shtetit si dhe institucionet e tejra që kanë ndikim në përpjekjen tonë për krijimin e një klime më të favorshme për të ushtruar profesionin e gazetarit në vendin tonë.

PRISHTINË, 28.03.2017 – Përfaqësuesit e Asociacionit të Gazetarëve të Kosovës takuan të martën drejtorin e përgjithshëm të Policisë së Kosovës, Shpend Maxhuni ku u diskutua për një bashkëpunim më të mirë për sigurinë e gazetarëve në vend.

Kryetari i bordit të AGK-së, Shkelqim Hysenaj prezantoi para drejtorit të policisë raportin e vitit të kaluar të asociacionit në lidhje me lirinë e mediave dhe sigurisë së gazetarëve, e në veçanti u diskutua për rekomandimet e dala për policinë.

Hysenaj kërkoi nga drejtori Maxhuni që Policia e Kosovës t’i trajtojë me prioritet rastet e sulmeve apo kanosjeve ndaj gazetarëve dhe për të njëjtat të bashkëpunojë me organet e drejtësisë. Po ashtu, një nga rekomandimet tjera ishte që të organizohen trajnime me oficerë policie që kanë për qëllim ngritjen e bashkëpunimit ndërmjet policisë dhe mediave.

AGK dhe Policia e Kosovës u dakorduan që së shpejti të fillojnë më organizimin e trajnimeve të ndryshme në të cilat do të jetë e përfshirë edhe AGK-ja.

Drejtori i përgjithshëm, Shpend Maxhuni u zotua për një bashkëpunim të ndërsjellë që do të ndikonte pozitivisht në punën e policisë dhe mediave në vend.

Në takim poashtu u diskutua për transparencën e policisë në raport me mediat ndërkohë që teme diskutimi poashtu ishte edhe trajtimi nga ana e Policisë së Kosovës të kërcënimeve që vijnë përmes rrjeteve sociale. Sa i përket kësaj cështje, drejtori Maxhuni deklaroi se institucioni që ai drejton, i trajton të gjitha llojet e kërcënimeve dhe sulmeve që mund të kenë gazetarët.

Duke ju referuar shifrave zyrtare, Maxhuni theksoi se policia ka qenë mjaft efektive në trajtimin e rasteve kur gazetarët janë viktimë e sulmeve, kërcënimeve apo kanosjeve si pasojë e punës së tyre profesionale qe bëjnë.