AGK dhe OSBE mbajtën tryezën përmbyllëse për “Rolin e medieve në raportimin e dhunës në familje”

By

-

30/11/2018

PRISHTINË 29.11.2018 – Asociacioni i Gazetarëve të Kosovës (AGK) në bashkëpunim me misionin e OSBE-së në Kosovë, kanë mbajtur tryezën përmbyllëse mbi “Rolin e medieve në raportimin e dhunës në familje”.

Kjo tryezë kishte për qëllim që të vlerësoi dhe diskutoi rolin e medieve dhe gazetarëve në lidhje me raportimin e dhunës në familje, ndikimit të cilin e kanë përmes raportimit dhe informimit në sensibilizimin dhe ndërgjegjësimin e qytetarëve dhe organeve të zbatimit të ligjit në luftimin dhe parandalimin e kësaj dukurie.

Në këtë tryezë u prezantua edhe udhëzuesi për gazetarë “Raportimi për dhunën në familje”, i botuar nga OSBE-ja, me ç’rast ambasadori Braathu, shprehi kënaqësinë që në kuadër të 16 ditëve të aktivitet kundër dhunës në familje, po prezantohet ky udhëzues, i cili, sipas tij, do t’iu vije në ndihëm të gjithë gazetarëve, të cilët, përmes punës së tyre do mund të ndërgjegjësojnë shoqërinë në parandalimin e kësaj dukurie.

Ambasadori i OSBE-së, tha se e Kosova është një vend i vogël për të pasur një numër kaq të madh të dhunës, dhe vlerësoj rolin që kanë mediet në luftimin e kësaj të keqeje sociale.

“Për rastet e dhunës në familje kemi mësuar nga mediet, sikur ju mos të kishit raportuar nuk do ishin raportuar fare, ndoshta OSBE-ja do ta dinte, por njerëzit në Kosovë duhet ta dinë dhe duhet të reagojnë, prandaj mediet kanë një rol shumë të rëndësishëm. Ne në OSBE duam të ju mbështesim ju për të raportuar në këto raste mjaft të vështira. 1128 raste janë raportuar në Policinë e Kosovës për dhunën në familje, dhe ky është një numër i madh për një vend kaq të vogël si Kosova”, tha ndër të tjera ambasadori i Braathu.

Ndërsa, në fjalën e saj, kryetarja e Asociacionit të Gazetarëve të Kosovës, Gentiana Begolli – Pustina, tha se OSBE-ja ka qenë gjithmonë kontribuuese përkrahë medieve, për të ndihmuar në raportimin e dhunës në familje.

“Një ndër fushat ku OSBE-ja, ka qenë gjithmonë kontribuuese dhe përkrahëse e pazëvendësueshme është edhe zhvillimi i medieve të lira dhe lirisë së të shprehurit, si dhe promovimi i të drejtave dhe i barazisë gjinore në përgjithësi, e me theks të veçantë angazhimin dhe luftimin e dhunës në familje. Si rezultat i kësaj pune dhe kontributi shumë të rëndësishëm për në po e mbajmë sot edhe këtë punëtori fokus i së cilës është roli i medieve në raportimin e dhunës në familje”.

Në anën tjetër, kryetari i Asociacionit të Gazetarëve serb në Kosovë, Budimir Nicic, foli për punëtorinë që organizata e tij e ka mbajtur në Graçanicë për gazetarët e komunitetit serb dhe rëndësinë e raportimit të dhunës në familje.

Në panelin diskutuese të kësaj tryeze ishin edhe gazetarët e dy televizioneve nacionale, Kaltrina Rexhepi-Dragusha nga Radio Televizioni i Kosovës (RTK) dhe Dije Bikliqi nga Kohavision (KTV), ku edhe prezantuan skoriet e tyre në lidhje me dhunë në familje, ato theksuan rëndësinë e madhe që kanë mediat në ndërgjegjësimin e shoqërisë karshi këtij fenomeni kaq negativë.

Të pranishëm në këtë tryezë diskutimin ishin edhe koordinatori nacional për Strategjinë Kombëtare për Mbrojtje nga Dhuna në Familje, Naim Qelaj, udhëheqësja e Sektorit kundër Dhunës në Familje në Policinë e Kosovës, Tahire Haxholli, zëvendës-kryetarja e Komisionit të Pavarur të Medieve, Violeta Hyseni-Kelmendi, përfaqësuesja e Rrjetit të Grave, Adelina Berisha, si dhe përfaqësuese të medieve nacionale dhe lokale.

AGK: Të ndalen kërcënimet ndaj burimeve të gazetarëve

By

AJK

-

27/11/2018

0

PRISHTINË 26.11.2018 – Asociacioni i Gazetarëve të Kosovës (AGK) e ka marrë me shqetësim njoftimin se drejtori i Shërbimit Spitalor Klinik Universitar, Basri Sejdiu, ka kërkuar zbulimin dhe dënimin e personit që ka bashkëpunuar me mediet, pas publikimit të videos së vërshimeve ku faktohen kushtet jashtëzakonisht të këqija të mbajtjes dhe ruajtjes së barnave në Barnatoren Qendrore në QKUK.

Ky fakt paraqet censurë dhe shkelje të të drejtave të punëtorëve dhe ndikon drejtpërdrejt në punën e medieve, duke u shkaktuar kështu pengesa në marrjen e informacioneve, në kohën kur institucionet çdo ditë e më shumë po vazhdojnë të mbyllen për publikun. Një gjë e tillë bie në kundërshtim edhe me Ligjin për Mbrojtjen e Sinjalizuesve, ligj ky, i cili, sapo është miratuar në Kuvendin e Kosovës dhe pritet që brenda tetë ditëve të hyjë në fuqi.

Kujtojmë se ky ligji mbron sinjalizuesit dhe obligon institucionet e Kosovës dhe jo vetëm, që të ofrojnë garanci për sinjalizuesit. Në të kundërtën, mos respektimi i neneve të këtij ligji përbën vepër të sanksionueshme për të gjithë.

AGK mbështet fuqishëm punën profesionale të të gjitha institucioneve dhe beson në parimet bazë të profesionit, po ashtu angazhohet që të siguroj ambient të favorshëm dhe të sigurt për gazetarët në ushtrimin e punës profesionale.

Asociacioni i Gazetarëve të Kosovës shpreson se ky shqetësim do të kuptohet qartë dhe drejtë nga të gjithë palët.

AGK reagon për përjashtimin arbitrar të dy punëtorëve nga RTV Dukagjini

By

AJK

-

17/11/2018

0

PRISHTINË, 17.11.2018 – Asociacioni i Gazetarëve të Kosovës shpreh shqetësim për mënyrën e largimit nga puna të dy kolegëve, Arben Rexhepi dhe Ervin Behluli, të cilët prej vitesh punonin në RTV Dukagjini.

Dy punëtorët u njoftuan për shkëputje të kontratës, përmes një emaili nga drejtori i këtij mediumi, Ermal Panduri pa arsyetime të qarta dhe pa u respektuar afatet kohore të përcaktuara me Ligjin e Punës, në rast të shkëputjes së marrëdhënies së punës.

Arben Rexhepi dhe Ervin Behluli kanë punuar prej rreth 20 vitesh në RTV Dukagjini dhe ishin pjesë e stafit themelues të kësaj medie.

AGK konsideron se mënyra e largimit të tyre nga puna është shkelje e rëndë e të drejtave të punëtorëve dhe njëkohësisht rëndon edhe më shumë ambientin në të cilin punojnë gazetarët në Kosovë.

AGK ka kërkuar pergjigje nga drejtori i RTV Dukagjinit z. Panduri rreth procedurave ligjore të ndjekura me rastin e largimit nga puna e dy punëtorëve në fjalë, mirëpo deri më tani nuk ka marrë shpjegim nga ana e tij.

AGK kërkon nga drejtuesit e RTV Dukagjini që t’i shfuqizojnë këto vendime, në mënyrë që dy punëtorët e larguar të kthehen sa më parë në vendin e tyre të punës.

Në të njejtën kohë AGK kërkon nga Inspektorati i Punës që në një afat sa më të shkurtër kohor, t’i shqyrtojë rastet në fjalë.

Asociacioni i Gazetarëve të Kosovës do t’i përcjellë nga afër këto raste dhe do t’i njoftojë të gjithë mekanizmat vendorë e ndërkombëtarë rreth këtij veprimi, që sipas AGK-së është arbitrar dhe tërësisht i papranueshëm.

Me respekt,
Bordi i AGK-së

AGK merr pjesë në debatin publik për draft rregulloren e komunikimit publik të zyres së Kryeministrit

By

AJK

-

02/11/2018

0

PRISHTINË, 01.11.2018 – Asociacioni i Gazetarëve të Kosovës (AGK) ka marr pjesë në diskutimin publik në lidhje me hartimin e projekt-rregullores për shërbimet e komunikimit qeveritar me publikun, të organizuar nga Zyra për Komunikim Publik në Zyrën e Kryeministrit (ZKM).

Gjatë këtij diskutimi, kryetarja e AGK-së Gentiana Begolli – Pustina, paraqiti komentet dhe qëndrimet e Asociacionit të Gazetarëve të Kosovës në lidhje me këtë projekt-rregullore, në veçanti me emërimin e zëdhënësve të ministrive dhe komunave, ku me anë të kësaj draft-rregullore parashihet që njëri nga këshilltarët politik të ministrit apo kryetarit të komunës, të emërohet në pozitën e zëdhënësit të ministrisë apo komunës përkatëse.

Kryetarja e AGK-së, theksoi se bartja e kompetencave tek individët politik për të komunikuar me publikun në emër të një institucioni mund ta politizojë dhe centralizojë dhënien e informacionit.

“Nëse komunikimi me publikun lihet në vullnetin politik të një ministri apo këshilltari politik ka një rrezik të madh që komplet ministria t’i përfaqësojë interesat politike dhe interesat e subjektit politik të ministrit, gjë e cila me automatizëm e vënë në dilemë vërtetësinë e informacionit, sa e paraqesin interesin publik informacionet, apo ato e paraqesin vetëm interesin e një ministri apo ministre të caktuar”, ka deklaruar kryetarja e Asociacionit të Gazetarëve të Kosovës, Gentiana Begolli – Pustina.

Po ashtu, AGK shpalosi qëndrimin e vet edhe në lidhje me qasjen e medieve në Qeverinë e Kosovës, me ç’rast u kërkua që përcaktimi i numrit të të akredituarve mos të vendoset nga Zyra për Komunikim Publik në ZKM, por numri i të akredituarve të bëhet në bashkëpunim dhe konform nevojave të mediumeve.

“Ka mediume në të cilat janë të punësuar mbi 100 gazetarë, kameramanë e fotografë, në anën tjetër ka mediume ku numri i përgjithshëm i të punësuarve, përfshi stafin administrativ nuk arrin në 20”, ka shtuar Begolli – Pustina.

Komentet e paraqitura gjatë diskutimit të sotëm për këtë projekt-rregullore, Asociacioni i Gazetarëve të Kosovës do t’i dorëzoj edhe me shkrim tek Zyra për Komunikim Publik në ZKM, e cila, është edhe hartuese e draft-rregullores për shërbimin e komunikimit qeveritar me publikun.

Gazetarët të përjashtohen nga ndjekja penale në projektligjin për mbrojtjen e informacionit të klasifikuar

By

AJK

-

25/10/2018

0

PRISHTINË 24.10.2018 – Asociacioni i Gazetarëve të Kosovës (AGK) ka marrë pjesë në tryezën e diskutimit në lidhje me projektligjin për mbrojtjen e informacionit të klasifikuar, të organizuar nga Qeveria e Kosovës si sponzorizuese e këtij projektligji.

Qëndrimet e dërguara me shkrim gjatë procesit të konsultimeve publike në lidhje me projektligjin në fjalë, AGK i ka shpalosur edhe sot gjatë diskutimit të hapur me akter të institucioneve vendore, përfaqësues nga zyra e BE-së në Kosovë si dhe pjesëtarë të shoqërisë civile.

Sipas nenit 71, pikës 3 të projektligjit për mbrojtjen e informacionit të klasifikuar në të cilin bëhet fjalë për sanksionet penale “Personi i cili publikon pa autorizim informacionin e klasifikuar sipas këtij ligji si “TEPËR SEKRET”, dhe cilido bartës i autorizuar i informacionit të tillë të klasifikuar i cili nuk e mbron informacionin e klasifikuar siç kërkohet me këtë ligj, kryen vepër penale dhe dënohet me burgim prej pesë (5) deri dymbëdhjetë (12) vite”.

Përfaqësuesi i Asociacionit të Gazetarëve të Kosovës, Ardian Nikolla, ka paraqitur qëndrimet e AGK-së në lidhje më këtë projektligj, duke thënë se një bazë e tillë ligjore do të cenonte të drejtën e lirisë së shprehjes dhe të mediave, si dhe do të ketë efekt frenues tek burimet dhe sinjalizuesit, të cilët, do të hezitonin të ndanin me gazetarë informacione që janë në interes të publikut, duke bërë kështu që mediat të pengohen që të realizojnë detyrën e tyre për të informuar publikun me informacione të sakta dhe të besueshme.

Për më tepër, AGK ka konsideruar se kjo bazë ligjore është në kundërshtim dhe duhet të harmonizohet me projektligjin për mbrojtjen e sinjalizuesve që gjatë këtij viti ka kaluar leximin e parë në Kuvendin e Kosovës. Sipas këtij projektligji, sinjalizuesit mbrohen nga çdo ndjekje penale apo civile për raportimin apo zbulimin e informacioneve që janë me interes të përgjithshëm.

AGK ka kërkuar nga komisioni për draftimin e projektligjit për mbrojtjen e informacionit të klasifikuar të bëhet përjashtim nga ndjekja penale për gazetarët, burimet e tyre dhe sinjalizuesit.

Aktakuzë ndaj biznesmenit që e kërcënoi redaksinë e gazetës “Insajderi”

By

AJK

-

19/10/2018

0

PRISHTINË 19.10.2018 – Prokuroria Themelore në Prizren, ka ngritur aktakuzë ndaj të pandehurit, Anton Jupa, për veprën penale të kanosjes, i cili, më datë 20.03.2018 e kishte bërë në drejtim të ekipit të gazetës online “Insajder”.

Pas raportimeve nga mediumi “Insajder”, për skandalin e mishit të prishur, ku kompania “Euro Ida” nga Rahoveci, pronari i së cilës është Anton Jupa, kishte importuar në Kosovë mish të vjetër nga kompania belge “Veviba”, Jupa kishte thirrur në redaksinë e Insajderit, me ç’rast e kishte kërcënuar me vrasje ekipin e saj.

“Problemet serioze janë shumë! Shumë serioze! A me ditë qaj personi që u kon i pari, pasha natën e babës që ka dekë e ai ka bo vetëvrasje, s’ka me e myt, vetëm kam me e copëtu me sakicë, kam me e copëtu edhe me masakru. Maje në mend qa po thom unë”, ishin fjalët të cilat i kishte thënë Jupa ekipit të redaksisë së gazetës “Insajder”.

Prokuroria e Themelore në Prizren, përveç ngritjes së aktakuzës për veprën penale të kanosjes, ndaj Jupës dhe tre personave të tjerë ka ngritur aktakuzë edhe për veprën penale prodhim dhe vënie në qarkullim të artikujve të dëmshëm ushqimor.

Ndahen çmimet e gazetarisë për storien më të mirë mbi varfërinë 2018

By

AJK

-

15/10/2018

0

PRISHTINË 15.10.2018 – Ekipi i Agjencive të Organizatës së Kombeve të Bashkuara në Kosovë (UNKT) në bashkëpunim me Asociacionin e Gazetarëve të Kosovës (AGK) kanë mbajtur ceremoninë e 13-të ndarjes së çmimeve për arritjet më të mira në gazetari për temën e varfërisë 2018.

– Çmimin për Video-storien e shkurtër më të mirë për vitin 2018 e ka fituar gazetarja, Merita Neziri, nga mediumi “Klan Kosova” me storien “Policia shpëton tre fëmijë në Gjilan”.

– Çmimin për Dokumentarin më të mirë televiziv e ka fituar gazetarja Kaltrina Rexhepi – Dragusha, nga mediumi “RTK” me dokumentarin “Fëmija Nënë”.

– Çmimin për Audio-storien më të mirë e ka fituar gazetarja, Majlinda Doda, nga mediumi “Radio Kosova” me audio storien “Migrimi dhe varfëria”.

– Çmimin për Storien e shkruar më të mirë e kanë fituar gazetaret, Besa Kalaja dhe Leonida Molliqaj nga Qendra Kosovare për Gazetari Hulumtuese “Preportr” me tregimin “Mos u plaksh”.

– Si dhe çmimin për Fotografinë më të mirë e ka fituar fotografi, Jeton Sopa, nga mediumi “Indeksonline”.

Në ceremoninë e ndarjes së çmimeve mbi varfërinë kanë marrë pjesë edhe Koordinatorja për Zhvillim e Kombeve të Bashkuara në Kosovë, Ulrika Richardson si dhe kryetarja e Asociacionit të Gazetarëve të Kosovës, Gentiana Begolli – Pustina.

Në fjalën e saj Koordinatorja për Zhvillim e Kombeve të Bashkuara në Kosovë, Ulrika Richardson, ka thënë se varfëria është një nga sfidat më të mëdha dhe se njerëzit që jetojnë në varfëri janë të margjinalizuar dhe vetëm mediet dhe gazetarët janë zëri i njerëzve që jetojnë në varfëri.

“E shohim gjithandej që njerëzit e varfër janë të margjinalizuar, nuk kanë qasje në kujdesin shëndetësor, në sistemin arsimor, nuk kanë qasje në punësim, kanë mungesë të informacionit, dijes, etj. Gazetarët e luajnë një rol të rëndësishëm këtu, sepse, varfëria ka të bëjë me të drejtat e njeriut. Prandaj, gazetaria dhe media janë përmbajtja e demokracisë, mediet dhe gazetarët janë zëri i njerëzve që jetojnë në varfëri”, ka thënë Richardson.

Ajo ka falënderuar AGK-në, për bashkëpunimin dhe traditën e krijuar ndër vite në ndarjen e çmimeve për arritjet më të mira në gazetari për temën e varfërisë.

Ndërsa Kryetarja e Asociacionit të Gazetarëve të Kosovës, Gentiana Begolli – Pustina, duke folur për varfërinë si një problem sistematik për vendin tonë, ka vënë në pah edhe problemet sociale me të cilat ballafaqohen gazetarët çdo ditë në vendet e punës.

“Kur flasim për varfërinë dhe sfidat që ajo ngërthen në vete, nuk mund të mos i kujtojmë problemet me të cilat ballafaqohen gazetarët çdo ditë në punë, ku një numër jo i vogël i tyre në raste të caktuara nuk posedojnë kontrata të punës si dhe ballafaqohen me kushte jo të mira materiale”Mirëpo, edhe përkundër këtyre vështirësive, gazetarët vazhdojnë të jenë kujdestarë të theksimit të nevojave kritike të shoqërisë tonë, duke bërë kështu që nëpërmjet punës së tyre të paraqitet gjendja e rëndë ekonomike – sociale e individëve dhe familjeve kosovare”, ka thënë ndër tjerash kryetarja e AGK-së.

Në fund, si pjesë e ngjarjes ishte edhe paraqitja në stilin TED talk i, Eoghan Sweeney nga First Draft që është një OJQ e bazuar në Qendrën Shorenstein të Universitetit Harvard, i cili, foli lidhur temën: “Keqinformimi dhe dezinformimi: rreziqet me të cilat ballafaqohen mediet”.

Organizatat gazetareske u dakorduan për minimum kritere për mediat onlajn

By

AJM

-

10/10/2018

0

SHKUP, 10.10.2018 – Shoqata e Gazetarëve të Maqedonisë, Sindikata e Pavarur e Gazetarëve dhe Punonjësve Mediatik dhe Këshilli për Etikë në Mediat në Maqedoni, u dakorduan për minimum kritere të cilët do të ndihmojnë për mbrojtje dhe promovim të gazetarisë profesioniste në mediat onlajn.

SHGM, SPGPM dhe KEMM besojnë se mediat onlajn duhet t’i respektojnë parimet dhe principet e profesionit gazetaresk, siç janë:

– Transparencë mbi pronësinë

– Publikimi i impresumit, kontaktit dhe adresës së mediumit

– Pranimi dhe respektimi i Kodit etik të gazetarëve

– Regjistrimi i subjektit juridik në Maqedoni.

Tre organizatat kërkojnë nga Qeveria dhe institucionet publike t’i respektojnë këto kritere në procesin e akreditimit të gazetarëve që punojnë në mediat onlajn.

Kërkojmë nga reklamuesit të marrin përgjegjësi shoqërore dhe të përmbahen nga reklamimi në mediat onlajn që nuk i përmbushin këto kritere.

Nëse Qeveria dhe reklamuesit nuk i respektojnë këto kritere do të kontribuojnë në mënyrë të drejtpërdrejtë në përforcimin e dezinformatave në mediat dhe përdorimin e tyre për qëllime propaganduese. Kjo mund të përdoret si alibi për të sjellë legjislativë restriktive për mediat onlajn që mund të kufizojë lirinë e të shprehurit në internet.

Organizatat e Kombeve të Bashkuara në Kosovë përkrahin fuqizimin e AGK-së

By

AJK

-

25/09/2018

0

PRISHTINË, 25.09.2018 – Kryetarja e Asociacionit të Gazetarëve të Kosovës, Gentiana Begolli – Pustina, në vazhdën e takimeve me partnerët dhe organizatat ndërkombëtare në Kosovë është pritur sot nga Koordinatorja për Zhvillim e Kombeve të Bashkuara, Ulrika Richardson.

Kryetarja Begolli- Pustina, ka kërkuar nga Richardson mbështetjen e mëtejme për Asociacionin e Gazetarëve të Kosovës, sikurse në ngritjen e kapaciteteve të organizatës ashtu edhe në rritjen e aktiviteteve konkrete në trajnimin e gazetarëve dhe avokimin e të drejtave të gazetarëve dhe sigurisë së tyre në Kosovë.

Nga ana tjetër, Ulrika Richardson, rikonfirmoj gatishmërinë e organizatave të Kombeve të Bashkuara në Kosovë për bashkëpunim me AGK-në, në secilin projekt që kontribuon drejtpërdrejt në avancimin e pozitës së gazetarëve në Kosovë dhe ngritjen e tyre të mëtejme profesionale.

Në takim gjithashtu u dakordua për intensifikimin e bashkëpunimit ndërmjet AGK-së dhe organizatave të Kombeve të Bashkuara në Kosovë më qëllim fillimin e realizimit të projekteve konkrete.

Safejournalists.net